Hondarribiko EAJ-PNVren udal taldeak 2027ko aurrekontuetarako hiru proposamen aurkeztu ditu, guztira 188.000 euroko inbertsioarekin. Ekimen horien helburua da udal zerbitzuak hobetzea, herriko elkarteen jarduera erraztea eta Udaltzaingoaren instalazioak egokitzeko urratsak ematea.

Proposamen horiek talde jeltzaleak udal administrazio hurbilago eta irisgarriago baten alde egiten duen apustuaren barruan kokatzen dira, herritarren eta Hondarribiko gizarte-bizitzari ekarpena egiten dioten eragileen beharrei erantzuteko.

Lehenik eta behin, EAJ-PNVk 18.000 euro bideratzea proposatu du elkarteentzako eta gobernuz kanpoko erakundeentzako (GKE) aholkularitza-zerbitzu bat eskaintzeko, haien kudeaketak eta administrazio-izapideak errazteko helburuarekin. María Serrano udal bozeramaileak neurri horren garrantzia azpimarratu du: “Elkarteek funtsezko lana egiten dute Hondarribian. Garrantzitsua da Udalean beren jarduera garatzeko laguntza aurkitzea, eta administrazio-izapideak oztopo gehigarri bat ez izatea”.

Era berean, talde jeltzaleak 20.000 euroko partida proposatu du udal lokalen erabilera aztertzeko, espazio horiek herriko elkarteen eskura jartzeko aukerak aztertuz. Ekimenaren helburua da dauden baliabideak hobeto ezagutzea eta horiek nola aprobetxatu aztertzea, elkarte eta eragile ezberdinen beharrei erantzuteko.

Azkenik, EAJ-PNVk 150.000 euroko inbertsioa proposatu du Udaltzaingoaren egoitzarentzako kokapen berri bat aztertzeko eta dagokion obra-proiektua idazteko. Helburua da lehen urratsak ematea, zerbitzuaren beharretara egokitutako instalazioak izateko aukera berri bat aztertuz.

“Udal zerbitzuek prest egon behar dute Hondarribiaren egungo eta etorkizuneko beharrei erantzuteko. Horregatik, garrantzitsua da hobekuntzak garaiz planifikatzea, aukera ezberdinak aztertzea eta proposamen zehatzekin aurrera egitea”, adierazi du Serranok.

Hondarribiko EAJ-PNVren ustez, hiru ekimen horiek helburu bera dute: herritarren eta Udalaren arteko harremana erraztea, baliabide publikoak hobeto aprobetxatzea eta udal zerbitzuak eskaintzeko baldintzak hobetzea.