Astigarragako EAJ-PNVk Batzoki berria inauguratu du gaur arratsaldean, Kale Nagusiko 20. zenbakian. Egoitza berriarekin, herritarrekin aurrez aurre elkartzeko gune bat berreskuratu du alderdiak. Irekiera, gainera, herriko erakunde jeltzalearen etapa berriaren hasierarekin batera iritsi da. Felix Zusberro Uri Buru Batzarreko presidentea da, eta EAJ-PNVren alkategaia izango da 2027ko udal hauteskundeetan.

Inaugurazioan izan dira Euge Arrizabalaga Gipuzko Buru Batzarreko presidentea, Zorione Etxezarraga Astigarragako alkate ohia eta Lide Irurzun EGI-Astigarragako ordezkaria. Belaunaldi desberdinetako jeltzaleak elkartu dira bertan, eta ekitaldiak esperientzia eta belaunaldi berrien parte-hartzea uztartzeko aukera eman du.

Felix Zusberrok Astigarragaren erronkei erantzuteko alternatiba planteatu du

Bere hitzaldian, Zusberrok politika egiteko modu hurbila, apala eta herritarren benetako beharrekiko konprometitua sustatzeko borondatea azaldu du.

“Astigarraga hobeto egon daiteke. Aukera handiak dituen herria daukagu, baina baita erantzunak behar dituzten erronka garrantzitsuak ere. Gauzak beste modu batera egin daitezkeela sinetsita nago”, adierazi du.

Alkategai jeltzaleak udalerriko erronkei plangintzarekin eta kudeatzeko gaitasunarekin heltzeko beharra defendatu du. Ildo horretan, EH Bilduren Udal Gobernuaren zenbait jarduera kritikatu ditu, bereziki herriguneko zirkulazio-aldaketak eta bidegorriaren obrak. EAJ-PNVren arabera, jarduera horiek trafiko-arazoak, sarbideetan eta aparkatzeko orduan zailtasunak eta tokiko merkataritzari eragozpenak eragin dizkiote.

Etxebizitza ere herriko kezka nagusien artean kokatu du, eta sustapen publikoko etxebizitzei bultzada handiagoa emateko eskatu du, bereziki alokairuko etxebizitzei, gazteek eta familiek etxebizitza eskuratzeko aukera gehiago izan ditzaten.

“Astigarragak ez du inprobisazio gehiagorik behar, ezta emaitzarik gabeko iragarpenik ere. Plangintza, kudeatzeko gaitasuna eta arazoei aurrea hartuko dien Udala behar ditu. Entzungo duen, lan egingo duen eta irtenbideak eskainiko dituen alternatiba eraiki nahi dugu”, defendatu du Zusberrok.

Herritarrei irekitako Batzokia

Zorione Etxezarraga alkate ohiak gogora ekarri du Batzokiek historian zehar elkargune eta parte hartzeko espazio gisa izan duten garrantzia. Bereziki, 2011-2015 legegintzaldiko esperientzia ekarri du gogora. Garai hartan, herriko erakundeak kalean bertan zuen egoitza, eta horrek herritarrekin eguneroko harremana errazten zuen.

“Gaur egun garrantzitsua da Astigarragako EAJ-PNVrentzat. Kalera itzuli gara, elkartzeko, entzuteko eta herritarren kezkak partekatzeko gune bat berreskuratu dugu. Batzoki honek Astigarragari irekitako etxea izan behar du”, nabarmendu du.

Batzoki berriak herriko erakunde jeltzalearen jarduera hartuko du aurrerantzean. EAJ-PNVren asmoa da egoitza herritarrekin harreman zuzena izateko, proposamenak jasotzeko eta Astigarragari eragiten dioten gaiei buruz hitz egiteko gune izatea.

Esperientzia eta belaunaldi berriak, protagonista

Euge Arrizabalaga Gipuzko Buru Batzarreko presidenteak inaugurazioan parte hartu du, herriko erakunde jeltzaleari etapa berri honetan babesa adierazteko.

Ekitaldiko unerik hunkigarrienetako bat Maria Jesus Arruabarrenari egindako omenaldia izan da. EAJ-PNVk zinegotzi gisa egindako ibilbidea eta urteetan zehar alderdiarekiko erakutsitako konpromisoa aitortu dizkio.

Euge Arrizabalagak haren dedikazioa eta proiektu jeltzalearekiko leialtasuna nabarmendu ditu, baita erakundearentzat garai zailenetan ere. Omenaldiaren bidez, Astigarragan EAJ-PNVren jarduerari eusten lagundu dioten pertsona guztien ekarpena ere aitortu nahi izan du alderdiak.

Bestalde, Lide Irurzun EGI-Astigarragako ordezkariak gazteen parte-hartzea sustatzeko ekimenak bultzatzeko borondatea azaldu du, haien kezkak eta proposamenak udalerriko eztabaidan txertatzeko helburuarekin.

2027ra begira, udal proiektu berria lantzen

Batzokiaren inaugurazioarekin batera, Astigarragako EAJ-PNVk 2027ko udal hauteskundeetarako proiektua lantzen jarraitzen du. Felix Zusberroren gidaritzapean, alderdiak etxebizitzarekin, mugikortasunarekin, segurtasunarekin, zerbitzu publikoekin eta bizi-kalitatearekin lotutako proposamenak garatu nahi ditu.

Kale Nagusiko 20. zenbakiko egoitza berria lan horretarako erreferentziazko guneetako bat izango da, herritarren ekarpenak jasotzeko eta udalerriaren beharrei buruzko elkarrizketa sustatzeko.

Astigarragako EAJ-PNVren helburua da herritarren kezkak proposamen zehatz bihurtzea eta datozen urteetarako gobernu alternatiba prestatzea.