EAJ-PNVk salatu du EH Bilduren Udal Gobernuak oraindik ez duela gauzatu Beti Alai pilotalekuko estalkia berritzeko eta fibrozementua kentzeko aurreikusitako 350.000 euroko partida, nahiz eta 2026an bi alderdien artean lortutako aurrekontu-akordioan jasotako proiektuetako bat izan. Talde jeltzaleak kezkagarritzat jo du adostutako jarduera honetan aurrerapausorik eman ez izana, eta hitzetatik ekintzetara pasatzeko eskatu dio Udal Gobernuari.

2026an, EAJ-PNVk, oposiziotik, eskua luzatu zion EH Bilduren Udal Gobernuari, hainbat proiektu desblokeatzeko eta herriko azpiegiturak eta zerbitzuak hobetzeko akordio bat lortzeko. Adostutako jardueren artean Beti Alai pilotalekuko estalkia berritzea zegoen. Horretarako, 350.000 euroko inbertsioa aurreikusi zen, baina gaur-gaurkoz gauzatu gabe jarraitzen du.

Joseba Aranburu udal talde jeltzaleko bozeramaileak proiektu honetan aurrerapausorik eman ez izana kritikatu du: “Akordioak lortzeak erantzukizunak hartzea esan nahi du, eta, batez ere, adostutakoa betetzea. EAJ-PNVtik herriarentzat beharrezkoak diren proiektuak aurrera ateratzeko elkarlanerako borondatea erakutsi genuen, baina borondate horrek gobernatzen duenaren erantzuna behar du. Ezin da onartu hartutako konpromisoak paperean geratzea, jarduerek geldirik jarraitzen duten bitartean”.

EAJ-PNVren ustez, Beti Alai pilotalekuaren egoera Udal Gobernuari leporatzen dion gauzatze faltaren beste adibide bat da. Talde jeltzaleak gogorarazi du aurrekontuetan diru-partida bat jasotzeak ez duela berez herritarrentzako hobekuntzarik ekartzen, ondoren jarduera zehatzetan gauzatzen ez bada.

“350.000 euro horiek helburu argi baterako zeuden aurreikusita: estalkia berritzea eta fibrozementua kentzea. Orain dagokiona da azaltzea zergatik ez den inbertsio hori gauzatu eta noiz egingo den. Herritarrek erantzunak, epe zehatzak eta beteko diren konpromisoak merezi dituzte”, adierazi du Aranburuk.

“Oposiziotik dugun erantzukizuna proposatzea, adostea eta hitzartutakoaren jarraipena egitea da. Horixe egin dugu, eta horretan jarraituko dugu. Baina gobernatzeak gauzatzea ere esan nahi du. EH Bilduk ulertu behar du konpromisoak hartzea ez dela nahikoa: hartutako konpromisoak bete egin behar dira”, amaitu du Joseba Aranburuk.