Soraluzeko EAJ-PNV udal taldeak udalerriko aparkaleku arazoari modu irmoan heltzeko beharra azpimarratu du berriro, Udal Gobernuak azken urtean eskatutako ibilgailu eta aparkaleku kopuruari buruzko datuak azkenean helarazi ondoren.

Udalak irailean emandako informazioaren arabera, Soraluzen gaur egun 2.000 ibilgailu inguru eta 1.724 aparkaleku plaza daude. EAJ-PNVren ustez, kopuru horien arteko aldeak herritarrek egunero bizi duten errealitatea agerian uzten du: aparkaleku falta eta eguneroko bizitzan sortzen diren zailtasunak.

Talde jeltzaleak gogorarazi du duela urte batzuk jada proposatu zuela Erregetxeko lurpeko aparkalekuaren proiektua berreskuratzea, aparkatzeko gaitasuna handitzeko lehen urrats gisa eta, aldi berean, kalean dagoen espazioa herritarren gozamenerako berreskuratzeko. Proposamen horren arabera, bi solairuko lurpeko aparkalekua eraikitzeko aukera aztertu beharko litzateke, eta gainazala oinezkoentzako gune, berdegune eta elkargune bihurtu.

Hiri Antolamendurako Plan Orokorrak (HAPO) aparkaleku berriak sortzeko hiru eremu jasotzen ditu: Kañonen ingurua, Olaldea eta Erregetxeko orubea. Lehenengo biek garapen urbanistiko luzeagoa eskatzen duten bitartean, Erregetxea epe laburrean gauzatzeko aukera erreal gisa agertzen da.

“Datu hauek urtebetez eskatu ondoren, azkenean Soraluzen aparkalekuaren benetako egoera ezagutu ahal izan dugu. Zenbakiek herritarrek egunero antzematen dutena berresten dute: ibilgailu gehiago daude erabilgarri dauden aparkaleku plazak baino, eta horrek eragozpenak, denbora galera eta ziurgabetasuna eragiten dizkie pertsona askori”, adierazi du Iker Aldazabalek, Soraluze EAJ-PNVko bozeramaileak.

Aldazabalek azpimarratu du udalerriak epe ertain eta luzerako plangintza behar duela behar horri erantzuteko: “Ez da soilik aparkaleku gehiago bilatzea; zer herri eredu nahi dugun pentsatzea da kontua. Mugikortasuna hobetu, pertsonen egunerokoa erraztu eta herritarren gozamenerako espazioak berreskuratzea ahalbidetuko duten irtenbideak behar ditugu”.

EAJ-PNVren ustez, aparkalekuen inguruko estrategia batek ez du soilik ibilgailuen beharrari erantzun behar, baizik eta Soraluze atseginagoa, irisgarriagoa eta bizitzeko erosoagoa egiteko helburua izan behar du.