Garay: “Arrasatek datozen 20 urteetarako pentsatutako eraldaketa behar du, soluzio integral, irisgarri eta konektatuekin. Muxibar-San Frantzisko arrasatearren bizitza hobetzeko proposamen serioa, planifikatua eta prestatua da”.

Arrasateko EAJ-PNVk mahai gainean jarri du Zarugalde ingurua eraldatzeko eta udalerriko mugikortasuna hobetzeko proposamena, etorkizuneko ikuspegi integral batekin: Muxibar-San Frantzisko proiektua. Mugikortasun jasangarriago, irisgarriago eta ordenatuago baten aldeko apustua egiten duen plana, baina baita bizilagunen bizi kalitatea mantentzearen aldekoa ere, etorkizunerako hobeto prestatutako hiri espazio, aparkaleku eta konexioak bermatuz.

Jarduera inprobisatuen eta plangintza gabekoen aurrean, talde jeltzaleak urteetan landutako eredu bat defendatzen du, fase eta irtenbide desberdinekin elkarrekin konektatuta, datozen hamarkadetan Arrasateren benetako beharrei erantzuteko pentsatua. Proposamenak EAJ-PNVk udalerrian mugikortasunaren eta hiri-berroneratzearen arloan aurretik defendatu duen ildoari jarraitzen dio, herritarren eguneroko bizitzarekin bateragarriak diren irtenbide integral eta jasangarrien alde eginez.

Muxibar-San Frantzisko proiektuaren ardatzak

EAJ-PNVk bultzatutako proiektuak hainbat jarduera estrategiko batzen ditu:

     • Zarugalde erabat oinezkoentzat bihurtzea, oinezkoentzako espazio atseginagoa eta seguruagoa sortuz, udalerriko beste puntu batzuekin konektatutako bi norabideko bidegorri batez lagunduta.

     • Espaloiak handitzea Otalora kalean, aparkalekuak mantenduz eta mugikortasunaren eta eguneroko jardueraren arteko bizikidetza hobetuz.

     • Arbolapeta eta San Frantzisko arteko lotura hobetzea, oinezkoen eta bizikleten irisgarritasuna lehenetsiz.

     • Lur azpiko aparkaleku berria Kondekuan, Monterron aurreko berdegunean, aparkaleku faltari behin betiko irtenbide estrukturala eskainiz.

     • Monterron Parkearen birdiseinua, sarbidea modernizatuz eta kultura, gizarte eta aisialdiko jardueretarako erabilera indartuz.

EAJ-PNVren ustez, hiri-berroneratzea ezin da jarduera isolatuetan soilik oinarritu, jasangarritasuna, irisgarritasuna, mugikortasuna eta herritarrentzako zerbitzuak uztartzen dituen estrategia koherente batean baizik.

Ander Garay bozeramaile jeltzaleak adierazi duenez, “Arrasatek biharkoan pentsatzen duten proiektuak merezi ditu, eta bat-bateko aktuazioak. Gure helburua da udalerri erosoagoa, irisgarriagoa eta etorkizunerako prestatuagoa eraikitzea, baina plangintzarekin eta bizilagunen benetako beharrei entzunda ”.

Talde jeltzalearen ustez, EH Bilduk Zarugalden bultzatu berri dituen jarduerek agerian uzten dute, hain zuzen ere, ikuspegi orokor horren falta. Hiri-eraldaketa integralik gabe planteatutako oinezkoentzako erabilera, inora ez doan bidegorri bat sortzea edo 30 aparkaleku-plaza baino gehiago aldez aurreko alternatibarik gabe kentzea, EAJ-PNVren iritziz, adabakietan oinarritutako kudeaketa baten adibideak dira, eta ez egiturazko irtenbideetan oinarritutakoak.

Gainera, EAJ-PNVk deitoratu du 40.000 euro inguru bideratu izana Zarugaldeko margoketara, arazoak konpontzen ez dituzten eta mugikortasuna benetan hobetzen ez duten neurrietara hain zuzen.

“Guk bai sinesten dugu mugikortasun jasangarrian, baina ondo egin behar da, plangintzarekin, alternatibekin eta pertsonek udalerriko egunerokoa nola bizi duten pentsatuta. Kontua ez da soilik kaleak ixtea edo lurrean lerroak margotzea; hobeto konektatutako Arrasate bat eraikitzea da, irisgarria eta funtzionala”, gaineratu du Garayk.

Arrasateko EAJ-PNVk azpimarratu du Muxibar-San Frantzisko proiektua alternatiba errealista eta anbizio handikoa dela Zarugalde eraldatzeko eta hurrengo belaunaldientzat pentsatutako udalerri eredu hobe baterantz aurrera egiteko.