EAJ-PNVk egungo udal gobernuak bultzatutako proiektuak jarri ditu mahai gainean: Iberdrolaren zentralaren lekualdaketa, Gudarien Plazaren berrantolaketa, Amillagako etxebizitza-garapena, Zubeltzuren erosketa eta adinekoentzako egoitza.

Debako EAJ-PNVk irmo erantzun die EH Bilduren azken kritikei, eta koalizioari eskatu dio etengabeko konfrontazio politikoa alde batera utzi eta aurreko agintaldian egindako kudeaketaren inguruko azalpenak emateko.

«EH Bilduk gardentasunaz, parte-hartzeaz eta kudeaketa onaz hitz egiten du etengabe. Baina gardentasunaren lezioak eman aurretik, bere gobernuak hartutako erabakiei buruzko galderak erantzun beharko lituzke. Erraza da oposiziotik kritikatzea; zailagoa, gobernuan egindakoaren kontuak ematea», adierazi dute jeltzaleek.

Gardentasunaz hitz gutxiago, azalpen gehiago

EAJ-PNVk gogora ekarri du EH Bilduren gobernuak aurreko agintaldian sustatutako Dagigun parte-hartze prozesua, eta haren inguruko hainbat galdera argitzeko eskatu du: zenbat kostatu zitzaien debarrei, nola hartu ziren erabakiak, zer informazio jaso zuten udal ordezkariek eta zer eragin izan zuten herritarren ekarpenek azken erabakietan.

«Parte-hartzea ez da herritarrei iritzia eskatzea bakarrik. Informazioa partekatzea, erabakiak azaltzea eta herritarren aurrean kontuak ematea ere bada. EH Bilduk hainbeste aldarrikatzen duen gardentasuna bere kudeaketan ere aplikatu behar du».

Jeltzaleek bereziki kezkagarritzat jo dute aurreko agintaldian udal langileei bidalitako mezu elektroniko bat. Haien arabera, mezu horretan gainerako alderdi politikoetako ordezkariei informazioa ematearen inguruko debekuak eta zigor-ohartarazpenak jasotzen ziren.

«Hori al da EH Bilduren gardentasun eredua? Udal informazioa ez da gobernatzen duen alderdiaren jabetza. Gardentasuna ezin da aldarrikapen hutsa izan; eguneroko jardunean erakutsi behar da».

Era berean, EAJ-PNVk udal baliabideen erabilerari buruzko kezka agertu du, eta udalaren kontura ordaindutako lanorduak alderdi baten propaganda politikorako erabiltzen diren argitzeko eskatu du.

«Udalak ordaintzen duen lan-denbora herritarren zerbitzura egon behar da, ez alderdi baten interes politikoen mesedetan. Erantzukizun instituzionala eta alderdiaren jarduera politikoa argi bereizi behar dira».

«EH Bilduk kritikatzen duen bitartean, guk urteetan konpondu gabe egon diren gaiei heldu diegu»

EAJ-PNVk egungo udal gobernuak bultzatutako proiektuak nabarmendu ditu, aurreko agintaldiko kudeaketarekin alderatzeko.

Horien artean daude Iberdrolaren zentralaren lekualdaketa, udalaren dirurik erabili gabe bideratua; Gudarien Plaza eta inguruaren berrantolaketa, oinezkoei protagonismo handiagoa emateko; eta Amillagako etxebizitza-garapena, etorkizuneko etxebizitza publikoaren ikuspegitik landua. Horiez gain, Zubeltzuren erosketa eta adinekoentzako egoitzaren lorpena azpimarratu dituzte.

«Horiek dira mahai gainean jar ditzakegun egitateak. Eta orain EH Bilduri galdetzen diogu: zein izan ziren zuen gobernuaren proiektu estrategiko nagusiak? Zein arazo konpondu zenituzten behin betiko? Zer utzi zenuten gauzatuta?».

Jeltzaleek argitu dute ez dutela esaten aurreko gobernuak ezer egin ez zuenik, baina herritarrek eskubidea dutela bi gobernuen emaitzak alderatzeko. «Eta alderaketa hori ez da esloganekin egiten, datuekin eta egitateekin baizik».

«Debak ez du eraso pertsonalik behar; eztabaida politiko serioa behar du»

EAJ-PNVk azkenaldian eztabaida politikoa pertsonalizatzeko izan den joera ere kritikatu du, eta EH Bilduri eskatu dio eztabaida udal kudeaketara eta herritarren benetako beharretara bideratzeko.

«Kritika politikoa zilegi da, eta gobernuan gaudenok naturaltasunez onartzen dugu. Baina gauza bat da kudeaketa kritikatzea, eta beste bat eraso pertsonaletara jotzea. Horrek ez du Debaren arazo bakar bat ere konpontzen».

Jeltzaleek azpimarratu dute ez dutela denborarik galdu nahi antzuak diren eztabaidetan, eta Debaren alde lanean jarraituko dutela. «EH Bilduk gardentasunaz hitz egin nahi badu, eman ditzala azalpenak. Kudeaketaz hitz egin nahi badu, alderatu ditzagun emaitzak. Eta Debaren etorkizunaz hitz egin nahi badu, aurkeztu ditzala proposamenak. Debak ez du zarata politiko gehiago behar. Debak lana, konponbideak eta etorkizuneko proiektuak behar ditu. Hitz gutxiago, lan gehiago. Debak merezi duelako».