EAJ-PNV Astigarragako udal taldeak Pelotari eta kale Nagusiko bizilagunen artean sortutako ezinegona salatu du, EH Bilduren Udal Gobernuak asfaltatze lanak kudeatzeko izan duen moduaren ondorioz, herriguneko bide nagusia erabat ixtea eragin izanagatik.

Talde jeltzaleak adierazi duenez, jarduketa komunikazio-plangintza egokirik gabe jarri da martxan, eta horrek egunerokoan hainbat zailtasun eragin dizkie inguruko bizilagunei. Bertako herritarrek helarazitakoaren arabera, aurretiazko informazio faltak eta seinaleztapen argien ezak ziurgabetasun eta kaos egoera sortu dute, bereziki kaxkoan bizi diren eta inguruan garajeak dituzten pertsonen artean; izan ere, aparkatzeko arazoak eta ibilgailuak erabiltzeko zailtasunak aurkitu dituzte.

EAJ-PNVk kritikatu du Udalak ez dituela behar besteko aurrerapenarekin eta argitasunarekin jakinarazi lanen nondik norakoak, aurreikusitako mozketak eta herritarrengan izango dituzten eragin zehatzak. “Herriko kale nagusiari eragiten dion jarduketa batek ezin du soilik sare sozialen eta udal webgunearen bidez edo nahasgarriak diren bandoen bitartez jakinarazpenik jaso, informazioa kaltetutako pertsona guztiengana iristen dela bermatu gabe”, adierazi dute talde jeltzaletik.

Horrez gain, udal gobernuak emandako azalpenetan argitasun falta egon dela salatu du alderdiak. “Bizilagunengandik jasotzen ari gara ez dakitela zehazki zer egingo den beren kalean, lanek garajeetarako eta etxebizitzetarako sarbideetan zer eragin izango duten eta zenbat iraungo duten, ezta lanak nola antolatuko diren edo zirkulazioa nola geratuko den ere. Udaletik iristen ari den informazioa ez da nahikoa, nahasgarria da eta, kasu batzuetan, kontraesankorra”, adierazi dute.

EAJ-PNVren ustez, arazoa ez dago udalerria hobetzeko beharrezkoak diren lanak egitean, baizik eta EH Bilduren Udal Gobernuak herritarrengan eragin zuzena duen jarduketa hori kudeatzeko moduan. “Lanek plangintza, koordinazioa eta enpatia eskatzen dute, eraginei aurre egin behar dieten pertsonekin. Udalak arazoei aurrea hartzeko prestatuta egon behar du, eta ez behin ezinegona sortu ondoren, jardun”, nabarmendu dute.

Udal talde jeltzaleak eskatu dio Udal Gobernuari azalpen argiak emateko, kaltetutako pertsonekiko komunikazioa hobetzeko eta lanek iraun bitartean sortutako eragozpenak murrizteko beharrezko neurriak hartzeko.

“Astigarragako herritarrek informatu, entzun eta lagunduko dien Udala merezi dute, bereziki udal jarduketa batek beren egunerokoan eragin zuzena edukiko badu”, amaitu dute esaten EAJ-PNV Astigarragatik.