Mendaroko EAJ-PNVren udal taldeak udalerriko zikinkeria eta bandalismo arazo gero eta handiagoa salatu du. Jeltzaleen arabera, bandalismo ekintzek eta zabor pilaketak udalerriaren irudia kaltetzeaz gain, herritarrentzako karga ekonomikoa ere badakarte, eta herritarrek beren gain hartu behar dituzte garbiketaren eta kalteak konpontzearen kostuak.

Mendaroko talde jeltzalearen bozeramaile Nerea Isasik adierazi duenez, “zikintzen dena eta hausten dena Mendaroko herritarrek ordaintzen dute azkenean. Funtsezkoa da neurriak hartzea egoera hori geldiarazteko, udalerriaren estetikari zein bizilagunen bizikidetzari eragiten baitio ”.

EAJ-PNVk Udalari eskatu dio gizarte-kontzientziazioa eta prebentzioa uztartzen dituzten neurriak ezartzeko, gertakari horiek saihesteko. “EH Bilduk bere gain hartu behar du konponbideen plangintzan duen erantzukizuna, gure kaleetako ordena eta garbitasuna hobetzeko, eta bandalismoa prebenitzeko, Mendaro mendaroarren bizi kalitateko lekua izaten jarrai dezan”, amaitu du Isasik.

Mendaroko talde jeltzaleak udalerriko bizilagun guztientzako ingurune garbi eta segurua bermatzeko neurri konkretuak bultzatzeko lanean jarraituko du, gizarte osoa inplikatuko duten epe luzeko neurriak ezartzeko beharra azpimarratuz.