Andoaingo EAJ-PNVk udalerrian autokarabanen aparkamendua modu argi eta objektiboan arautzea eskatu du. Ekimenaren oinarrian dago azken urteotan ibilgailu mota horiek izan duten hazkunde nabarmena eta herriko hainbat tokitan dagoeneko sortzen ari diren bizikidetza-arazoak.

Gaur egun, egoera bereziki nabarmena da Arrateko frontoiaren inguruan, bai Arrate Plaza atzekaldean; lehenago, ordea, udalerriko hainbat aparkalekutan ere gertatu izan da arazoak, besteak beste Leizaran institutuaren inguruneetan. Andoaingo EAJ-PNVk behin eta berriz jaso ditu herritarren kezkak egoera horren inguruan.

EAJ-PNVtik gogorarazi dute hiri-bideetako ibilgailuen aparkalekua udalaren eskumena dela, eta Andoainek Trafikoaren Ordenantza Orokorra indarrean duela. Hala ere, 9.3 artikuluaren edukia ez da nahikoa autokarabanen aparkamendua behar bezala arautzeko. Araudi argirik ezean, denbora-luzeko aparkatzeak, espazio publikoaren okupazio desegokiak, hondakinen edo isurketen arazoak eta Udaltzaingoaren jardunerako zailtasunak errepikatu egin dira.

Egoera horren aurrean, EAJ-PNVk mozio bat erregistratu du hurrengo ohiko osoko bilkuran eztabaidatua izan dadin. Helburua argia da: autokarabanen fenomenoa modu errealista, orekatu eta juridikoki sendoan jorratzea, bizikidetza bermatuz eta herritarren bizi-kalitatea lehenetsiz.

Mozioak hainbat konpromiso zehatz jasotzen ditu. Lehenik eta behin, Andoaingo Udalak autokarabanen aparkaleku errealitateari erantzuteko borondate politikoa adieraztea proposatzen da, espazio publikoaren erabilerarako eskubidea, hiri-ingurunearen babesa eta bizilagunen ongizatea bateragarri eginez.

Bigarrenik, udal-ordenantza espezifiko bat idaztea edo indarrean dagoen araua egokitzea planteatzen da, autokarabanen aparkalekua modu argian arautzeko. Ordenantza horrek gutxienez honako irizpide hauek jaso beharko lituzke: gune jakinetan aparkatzeko denbora-mugak ezartzea txandakatzea edo errotazioa sustatzeko; arau-hausteen eta santzioen erregimen zehatza definitzea, espazio publikoaren okupazio desegokiari mugak jartzeko; eta hartzen diren neurriek segurtasun juridikoa bermatzea, bai herritarrentzat bai autokarabanen erabiltzaileentzat.

Hirugarrenik, mozioak azterketa tekniko bat egitea proposatzen du, autokarabanentzako aparkaleku arautu bat prestatzea bideragarria izan daitekeen baloratzeko. Aurreko agintaldian udal-teknikariek dagoeneko aztertu zuten Balastrain industrialdea edo Ezkerraeneako lursailaren moduko kokalekuen bideragarritasuna. Neurri honen helburua ibilgailu horien presentzia antolatzea, eragin negatiboak minimizatzea eta auzokideekiko bizikidetza hobetzea da.

Andoaingo EAJ-PNVk azpimarratu nahi du mozio honen helburua ez dela inor seinalatzea, gero eta presenteagoa den errealitate bati irtenbide ordenatuak eskaintzea baizik, beste udalerri askok egin duten bezala. Alderdi jeltzalearen iritziz, araudi argi bat izatea da gatazkak saihesteko eta Andoaingo espazio publikoaren erabilera egokia eta bizikidetza bermatzeko tresnarik onena.