“Ez da onargarria Kutxa banku-fundazioa (Kutxabanken %32aren jabea eta gizarte-ekintzara bideratutako erakundea) alderdien arteko konfrontaziorako tresna bilakatzea”, adierazi du EAJ-PNVko bozeramaile Euge Arrizabalagak. Gaur Gipuzkoako Batzar Nagusietan egindako osoko bilkuran, jarrera argia defendatu du Kutxa Fundazioak Ayesaren erosketa-operazioari dagokionez hartutako erabakiaren inguruan. Arrizabalagaren hitzetan, “eztabaida politikoa egon daiteke eta egon behar du; onartezina dena da logika hori burujabea den erakunde baten jardunera eramatea, hau da, bere izaerari, Plan Estrategikoari, erabaki-esparruari, misioari eta berezko dituen erantzukizunei jarraikiz erabakiak hartzen dituen fundazio baten kasuan”.

EAJ-PNVk azpimarratzen du Kutxa Fundazioa ez dela banku-erakunde bat, ezta errentagarritasun finantzarioan oinarritutako inbertsio-estrategia bati erantzuten dion entitatea ere. Bere izateko arrazoia interes orokorrekoa da, Lurraldearen eta Herriaren garapen sozialean, kulturalean, ekonomikoan eta komunitarioan errotua; horregatik, Kutxa Fundazioari dagokio bere inbertsioak baloratzea, bere Plan Estrategikoarekin duten egokitzapenaren eta egokitzat jotzen duen arriskuen kudeaketaren arabera.

EAJ-PNVko batzar-taldearen arabera, Kutxa Fundazioaren patronatuan aniztasuna dago eta askotariko sentsibilitateak daude, baita gizarte- eta lan-arloetakoak ere. Haratago, Patronoek Gipuzkoako aniztasuna ordezkatzeko asmoa dute, Estatutuetan ezarritako betekizun etikoak, ezagutza-mailakoak eta independentzia-irizpideak betzen dituzte. Ayesaren eragiketari buruz hartutako erabakian agerian geratu dira Patronatuan dauden ikuspuntuak, Fundazioaren gobernu-organoa den heinean. Arrizabalagaren esanetan, errealitate hori sinplifikatzeak edo interes alderdikoien mesedetan Kutxaren jarduna instrumentalizatzeak instituzioen gaineko konfiantza ahultzea eta eztabaida publikoa desitxuratzea besterik ez du eragiten. Areago, etengabeko kanpo-ikuskaritzen pean dagoen erakunde baten lana arriskuan jar dezake.

EAJ-PNVk Gipuzkoako industria- eta teknologia-ehunaren sendotzea eta proiektu estrategikoen errotzea defendatzen ditu. Hala ere, azpimarratzen du helburu hori politika publikoen berezko tresnen bidez eta lankidetza publiko-pribatuaren bidez landu behar dela, bai eta Kutxa Fundazioa bezalako eragile aktiboekin elkarlanean ere; ez ordea gizarte-erakundeak seinalatuz, beste batzuei dagozkien erabaki-esparruak inbadituz edo interes jakinen araberako interpretazio behartuak eginez.

Ildo horretan, EAJ-PNVko batzar-taldearen ustez, erakundeek honako hauek egin behar dituzte:

       • Tresna eraginkor eta egonkorren bidez politika ekonomiko eta industrialak indartu.

       • Eragiketa estrategikoetan segurtasun juridikoa eta sinesgarritasun instituzionala zaindu.

       • Erakunde publiko bakoitzari eta banku-fundazio bakoitzari dagokion erabaki-autonomia errespetatu, gizarte-ekintzaren eta inbertsio-politiken arduradun diren heinean.

EAJ-PNVrentzat, Gipuzkoak eztabaida politikoaren esparruan akordio erabilgarriak behar ditu, ez iraupen laburreko borroka politikoak. Horregatik, alderdi guztiei erantzukizunez eta zentzu instituzionalarekin jokatzeko deia egiten die.