EAJ-PNV Arrasate kezkatuta agertu da gaur arratsaldeko osoko bilkuran eztabaidatu zen Mugikortasun Iraunkorreko Planaren inguruan adostasunik ez dagoelako. Ander Garay alderdiko bozeramailearen arabera, "EH Bilduko eta Elkarrekin Arrasateren gobernu taldeak zalantzak agertu ditu planaren inguruan azken minutuan, hainbat herritar prentsara salto egiten ari zirela ikusita, azken orduan aldaketak eginez herritarrekin prozesu parte-hartzailerik egin gabe eta arrabola ezarriz".

EAJ-PNVk bere boto partikularra aurkeztu du Mugikortasun Planean aldaketak egiteko: bi norabideko bideak mantentzea, lur-azpiko aparkalekuak eta garraio publikoaren bultzada.

Garayk azaldu duenez, azken orduan, eta alkatearen aginduz, EAJ-PNVko ordezkariak ezohiko eta premiazko batzorde batera deitu zituzten Osoko Bilkura baino lehen, planaren aldaketak eztabaidatzeko. Bere ustez, “horrek gobernu-taldeak ez duela argi zer plan onartu nahi duen eta ez dela prozesua behar bezala kudeatzen ari erakusten du”.

"Hasieratik, benetako parte-hartze prozesu baten beharra azpimarratu dugu, arrasatearrei entzun eta erabakiak partekatuko dituena. Hala ere, ez gaituzte entzun, eta herritarrei ez diete utzi Mugikortasun Planaren inguruan iritzia ematen eta iproiektuan parte hartzen ", adierazi du Garayk.

EAJ-PNVko bozeramaileak gogorarazi duenez, abenduko plenoan bi eskari garrantzitsu egin ziren: Hirigintza Aholku Batzordea deitzea alegazioak lantzeko eta alegazioak aurkeztu zituzten herritarrei haiek Hirigintza Batzordean defendatzeko aukera ematea. Bi eskari hauek baztertu ziren, eta Garayk uste du hori herritarren parte-hartzerako konpromiso falta dela: “zailtasun guztien artean, udal gobernuak alderdi bakar bati, alderdi sozialistak aurkeztutako alegazioak defendatzeko aukera eman dio, eta gainontzeko herritarrek ez dute aukera bera izan”.

Bozeramaileak gogorarazi duenez, autobus-geltokiaren kokapenari dagokionez, gobernuak prozesu parte-hartzailea baimendu zuen, eta hori kokapenari buruzko bozketa batean gertatu zen. Hala ere, Mugikortasun Planaren kasuan, EAJ-PNVk gobernuak uko egiten diola plan hori bozkatzera eramateari kritikatu du, herritarren babesa duen ala ez jakiteko. "Gehiengoak onartuko duen mugikortasun plan bat benetan nahi bada, bozketa egitea eta arrasatear guztiek euren iritzia emateko aukera izatea beste aukerarik ez dago", adierazi du Garayk.

Horregatik guztiagatik, EAJ-PNVk Mugikortasun Jasangarriaren Planarekin lotutako puntua mahai gainean gera dadila eskatu du, benetako parte-hartze prozesu bat abian jarri arte. Jeltzaleek “arrasatearrek eta arrasatearrentzat egindako mugikortasun-plan baten alde egiten dugu, erabakiak elkarrekin hartuz, gardentasuna eta herritarren parte-hartze aktiboa bermatuz”.

"Benetako parte-hartze prozesu bat irekitzea, informazio guztia partekatzea eta herri-kontsulta bat bultzatzea eskatzen dugu, autobus-geltokiarekin egin zen bezala. Horrela bakarrik izango da Mugikortasun Plan hau benetan iraunkorra eta herritar guztien babesa izango du ", amaitu du Garaik.