Goierriko (Gipuzkoa) eta Nafarroako alkate eta zinegotziek agerraldi bateratua egin dute, Euskal Y-aren eta Nafarroaren arteko konexioa Ezkiotik egitea “Euskadiko eta Goierri eskualdeko garapenerako eta mugikortasun jasangarrirako funtsezkoa” dela aldarrikatzeko. Ekitaldia, hain zuzen, etorkizuneko Ezkio-Itsasoko geltokia kokatuko den lekuan egin dute.

Ordezkari politikoen ustez, euskal abiadura handiko trenbide sarea "herri proiektu estrategikoa da, euskal lurralde guztien kohesio sozioekonomikorako giltzarria, Nafarroatik Bizkaira edo Arabatik Iparralderaino".

Ildo horretan, uste dute "trenbide-azpiegitura ikuspegiari eta erabiltzaileen zerbitzuari dagokionez, Ezkioko konexioak aukera eraginkorrena dela frogatu dela, bai funtzionaltasunari dagokionez, bai ingurumenaren ikuspegitik ". Horregatik, Garraio Ministerioari erabakiak hartzeko "azkartasuna, seriotasuna eta zorroztasuna" eskatzen diote, betiere, erakundeen arteko eztabaida leialaren esparruan, Estatua, Eusko Jaurlaritza eta Nafarroako Gobernuaren arteko Lankidetza Protokoloan adostu zen bezala.

Bestalde, aldarrikatu dute Ezkioko geltokiak “intercity” tren zerbitzuen bidez eskualdeko herritarrak 30 minutu baino gutxiagoan Euskal Herriko hiriburu nagusiekin (Bilbo, Donostia, Gasteiz, Iruñea) lotuko dituela, eta, aldi berean, merkantzien garraioak bertako industriarentzako ekarriko duen lehiakortasun-hobekuntza azpimarratu dute. Nabarmendu dute “trena etorkizuna dela, eta, beraz, azpiegitura moderno eta lehiakor bat behar dugula, pertsonak hurbildu eta konektatzeko ez ezik, gure errepideak zama astuneko trafikotik arintzeko ere”.

Horrez gain, salatu dute “Ezkioko azpiegitura geltoki-fantasma bihurtuko dela” esanez egindako desinformazio-kanpaina. Gogorarazi dute Ezkioko-Itsasoko azpiegituraren beharra Nafarroarekiko konexioa nondik egiten den zehaztetik harago doala. Gogorarazi dute Euskal Y-ak tren-maniobrak zehatzak egiteko lekua behar duela, eta Ezkioko geltokia horretarako funtsezkoa dela, izan ere, Trenen Aurreratze eta Aparkaleku Postu (PAET) gisa funtzionatuko baitu. Era berean, Eusko Jaurlaritzak - Euskotrenek eta Euroeskualdeak etorkizuneko ustiapenaren inguruan egindako analisietan, intercity zerbitzuek Ezkioko-Itsasoko geltokian geldialdia egitea aurreikusten dela gogorarazi dute.

Adierazpena sinatzen dute Leire Artola (Beasain), Jon Luqui (Urretxu), Eric Galvez (Legazpi), Kepa Zubiarrain (Lazkao) alkateek; Javier Leoz (Iruña), Joseba Aranburu (Ordizia), Josu Idigoras (Zumarraga) zinegotziek; eta Idiazabal, Zegama, Zaldibia, Ataun eta Legorretako ordezkariek, besteak beste.