Argi dago gauzak egiteko oso modu desberdina dugula. Eta formek, askotan, asko esaten dute. 20 hilabete daramatzagu ezker abertzalearen gobernuarekin Hondarribian. Beren diskurtsoetan hainbeste aipatzen duten gardentasuna ez da egunerokora eramaten. Ia ez dago udal gaien inguruko harremanik eta komunikaziorik oposizioko udal taldeekin.

Hondarribian ezker abertzalearen gehiengo osoaren gobernua honela deskriba liteke: “Alkate dekretuen eta prentsaurrekoen gobernua". Apurka-apurka, lantaldeak desagertzen ari dira. Lantalde horietan, urteetan zehar, adostasun garrantzitsuak lortu dira talde politiko guztien artean, eta diskrezioz lan egin da gai zailetan aurrera egiteko. Eztabaidaezina da mugikortasun-mahaia edo Mendeluko mahaia, adibidez, deitzeko maiztasuna murriztu egin dela azkeneko hilabetetan.

Abotsanitzek eta EH Bilduk alde bakarretik amaitu dute Bizikidetza Batzordea, urteetan Hondarribian bultzatu dena eta memoria historikoaren arloan aurrerapauso asko ematea ahalbidetu duena. Inolako arrazoirik gabe, gobernuko bi alderdiek batzorde hori likidatu dute, oraindik lan handia baitago egiteko hurbileko memoriarekin (1978tik gaur arte) eta giza eskubideekin lotuta.

Eta gaur, komunikabideei bidalitako deialdi baten bidez, jakin dugu bihar, asteazkena, prentsaurreko batean jakinaraziko direla Alardeari buruz egindako inkestaren emaitzak eta emaitzak sozializatzeko kanpaina bat. Urteak dira elkarrekin lan egiten zela, talde politiko guztiekin, bozeramaileen batzorde batean, bizikidetzaren aldeko aurrerapausoak emateko eta elkarrizketaren kultura sustatzeko. Baina lantalde horrek ez ditu ezagutzen inkestaren emaitzak, ezta udal gobernuak inkesta gizarteratzeko hartu dituen erabakiak ere.

Gure ustez, hau ez da oposizioko talde politikoekin lan egiteko modurik onena. Eta ez dugu gure zinegotziekiko iraintzat hartzen bakarrik, herritarrekiko errespetu eta begirune faltatzat baizik, udal ordezkariak baikara.

Agian, informazioa eta gardentasuna eskatzeko erabilitako tonua deserosoa izan da. Baina uste dugu gobernatzeko eta oposizioarekin harremanak izateko modu horrek, alkatetza-dekretuen eta prentsaurrekoen bidez, egoera desatsegin horiek sortzen dituela.