Udalak 2025ari aurrekontu luzatuarekin ekin dio, eta gure alkateak, egoeraren erantzukizunen bat bere gain hartu beharrean, errua besteei leporatzera jotzen du, ohi bezala, baloiak kanpora.

EH Bilduk, alkatea buru zuela, bere akatsak ez onartzea erabaki zuen, eta diskurtso biktimista baten alde egin zuen.

Hau esanda, idatzi hau sinatzen dugunok saiatuko gara, herritarrei argi eta garbi azaltzen  zergatik ezin izan dugun lortu nahi genuen akordioa. Ziur gure alkateak baino hobeto ulertzen dutela herritarrek.

Goazen puntuz puntu:

1.- Udal-aurrekontua, denok dakizuen bezala, udalak berak emandako zerbitzu guztien aurrekontuak eta udalaren mende dauden enpresa edo erakunde autonomoen aurrekontuak ("ORDIZIA LANTZEN" eta "MAJORI KIROL GUNEA") batuta ateratzen da. Hori guztia aurrekontuan sartuta egon behar da.

Alkateak azaldu zuen bezala, urriaren 28an oposizioko alderdiei 2025erako udal aurrekontuaren proiektuaren zirriborroa bidali ziguten, baina azaroaren 8ra arte ez genuen jaso ez "MAJORI KIROL GUNEA"ren aurrekontu proiektua (udal aurrekontuari neurri handi batean eragiten dio), ez ORDIZIA LANTZEN-ena (nahiz eta ez dien aurrekontu orokorrei nabarmen eragiten). Alkateak ez zuen azken informazio hori aipatu bere agerraldian, nahiz eta "Majori Konplexuaren" aurrekontuak, konplexuak berak, tarifen eta prezioen aplikaziotik sortutako diru-sarrerak  barne hartzen dituen. Prezio horiek 2025eko urtarrilaren 1a baino lehen onartu behar ditu Administrazio Kontseiluak. Hala ere, tarifen proposamena ez zitzaigun abenduaren 17ra arte entregatu, hau da, osoko bilkura baino bi egun lehenago. Eta, indarrean sartu eta egun gutxira, oraindik ez daukagu 2025ean Kiroldegiko tabernan aplikatuko diren prezioen proposamenik. Are gehiago, osoko bilkuraren egunean bertan egindako Administrazio Kontseiluan jakinarazi ziguten "abonatuen kuotetarako" aurreikusitako  465.000 eurotako diru-sarrerak,  ez zirela zuzenak.

Beraz, EHBilduk 2025erako egindako proposamena ez zaigu serioa iruditzen, ez eta garaiz eta behar bezala aurkeztutakoa ere.

2.- Azken urteotako esperientziak esaten eta erakusten digu EH Bilduk ez dituela aurrekontu-konpromisoak betetzen eta, beraz, ez dituela oposizioko taldeak errespetatzen.

EH Bilduren gobernuek aurrekontu-konpromisoak ez betetzearen adierazlerik argiena Hiri Antolamenduko Plangintza Orokorra da, Ordiziako lurraldearen antolamendu integralerako oinarrizko tresna. HAPOk aukera ematen du lurzorua sailkatzeko, lurzoru mota bakoitzari aplikatu beharreko erregimena zehazteko eta udalerriko ekipamendu sistemaren funtsezko elementuak zehazteko, baina, urtez urteko aurrekontua izan arren, EH Bildu ez da gai hori kudeatzeko eta gauzatzeko.

Beste inbertsio eta konpromiso batzuei dagokienez, ikus dezakegu, Urdaneta ikastetxeko inbertsioei esleitutako 700.000 euroetatik 50.572,33 baino ez direla gauzatu, adibidez. Eta ezin da ahaztu herria egoera negargarrian dagoela: espaloiak zikinak, bide publikoak egoera okerrean, pintadak dituzten eraikin publiko eta pribatuak, estoldak kolapsatuta,  arratoi eta labezomorro izurriteak hainbat tokitan, altzari publikoa hondatua, komunak egoera txarrean, irisgarritasuna konprometitua puntu askotan irisgarritasun gabeziagatik. Kutxatila-estalkiak hainbat bidetan hondoratuta daude; herritarrek argiteria publikoa zalantzan jartzen dute hainbat gunetan; Gazte Lokala ez dago zainduta; bizikidetza-planik ez dago; eta 2024an ez da asfaltaturik egin, beste hutsune askoren artean. Gure herriaren irudia tristea da eta lehenbailehen zuzendu behar dugu, baina EH Bildu hori egiteko gai ez dela erakusten ari da.

EH Bilduk 2025erako egindako proposamena ez da sinesgarria, eta zalantza handiak eta sendoak sortzen ditu.

3.- Zintzotasun falta horrekin,  aurrekontuen proiektuan lan egin duten pertsonen ahaleginarekiko errespetu falta eta gutxiespena, adierazten dute.  Herritarrei eta eragileei kaltea eragiten die. EH Bilduk oposizioko taldeekin akordioak lortzeko duen borondate ezaren isla argia dira. Konplizitateak erakartzeko, lankidetza bultzatzeko eta elkarlan emankor baten oinarriak ezartzeko modu bitxia da.

Bere jarrera iraingarriarekin, EH Bilduk oposizioarekin lankidetza eta elkarlana oztopatzen ditu.

4.- Bestalde, gogoratu behar da EAJ-PNVren eta PSE-EEren abstentzioak aukera eman zuela 2024ko aurrekontuak onartzeko eta Europako funtsek diruz lagundutako inbertsioak blindatzeko. Orain arte, oposizioaren jarrera eraikitzailea egiaztatu da;  EH Bilduren Gobernuak bere ardurak bete ez arren. Ordiziarentzat positibotzat jotzen ditugun proposamenak aurkeztu ditugu eta ez dugu oztopatu aurrekontua gauzatzea. Jarrera kolaboratzaile eta proposatzaile horrek gure lan politikoa ezaugarritzen jarraituko du, baina, oraingoan, proposatzen diren inbertsioak eta aurrekontu-aldaketak lupaz begiratuz egingo dugu.

Hau da, aurrekontuen kudeaketa zorrotzago ikuskatuko dugu, hori baita, azken batean, oposizioaren zeregin nagusietako bat.

5.- Amaitzeko, uste dugu beharrezkoa dela gogoraraztea, EH Bildu oposizioan zegoenean planteatzen zuena, orduko gobernuaren ez-betetzeen ondorioa zela aurrekontuen luzapena, eta ondorioz, azken hau, inbertsioak eta zegozkien kreditu-aldaketak banan-banan aurkeztera behartua zegoela, eztabaida osasuntsu eta argigarri bati eta negoziazio demokratikoari ekiteko. Beraz, kontsekuente balitz, EH Bilduren egungo gobernuak proiektuz proiektu aurkeztu beharko lituzke bere proposamenak, guztien jarrerak argi gera daitezen. Eta, beren ez-betetzeek eta kudeaketa faltak sortu duen egoera honetan, formula ona iruditzen zaigu.

Bere proposamenak banan-banan aztertuko ditugu, sakonki, eta gureak ahalik eta argitasun eta gardentasun handienaz aurkeztuko ditugu, banan-banan, eztabaida, negoziazioa eta, jakina, adostutakoa, kontrolatzea eta betetzea bermatzen saiatuz.

Amaitzeko, gogorarazi nahi dugu orain proposatzen ari garen hau ez dela gauza berria, EH Bildu berak jarri zuela martxan aurreko legegintzaldietan, eta ez zuela inor "zigortzeko" asmoz egin, uste dugu.

Horregatik hasi da Udala 2025ean aurrekontua luzatuta. Orain, ordiziarrek beharrezko elementuak dituzte EH Bilduren Gobernuaren eta oposizioaren jokabidea baloratu ahal izateko.