Arrasateko EAJ-PNVk udal gobernuaren plangintza eta kudeaketa-gaitasun falta salatu du Txiki Txokoa handitzeko lanek izandako etengabeko atzerapenen aurrean. Talde jeltzaleak 2024an bultzatutako proiektua da, baina oraindik ez da gauzatu.

EAJ-PNVren proposamenari jarraituz, 2025aren hasieran ondoko lokalaren alokairua formalizatu zen, instalazioak handitzeko. Urte bereko azaroan, talde jeltzaleak lanak bizkortzeko eskatu zuen, 2026-2027ko negurako Arrasateko familiek espazio egokiago bat izan zezaten.

Hala ere, 2026aren hasieran abiatutako lizitazioa esleitu gabe geratu zen martxoan, eta, ordutik, udal gobernuak sei hilabete baino gehiago igarotzen utzi ditu arazoari irtenbiderik eman gabe eta lanak berriro kontratatzeko beharrezko finantzaketa bermatu gabe.

EAJ-PNVren ustez, gertatutakoak agerian uzten du udal gobernuaren kudeaketa-gaitasun falta kezkagarria. Arintasunez konpondu beharreko kontratazio-arazo batek hilabete luzez geldiarazi du Arrasateko familientzat beharrezkoa den jarduketa. Gainera, jakinarazitako epeen arabera, kontratazio-prozesua ezin izango da abendura arte berriro martxan jarri, eta horrek atzerapen gehiago ekarriko ditu.

Ander Garay bozeramaile jeltzaleak gogor kritikatu du egoera: “Ez gara proiektu konplexu batez ari, ezta bat-batean sortutako jarduketa batez ere. 2024tik ari gara handitze-lan horiek eskatzen, eta, lokala dagoeneko alokatuta egon arren, oraindik ez dira lanak hasi eta ez dago benetako irtenbiderik. Kezkagarriena ez da lizitazio bat esleitu gabe geratzea, hori gerta baitaiteke, baizik eta udal gobernuak urte erdi baino gehiagoan erantzuteko gaitasunik ez izatea. Gobernatzeak arazoei aurrea hartzea, erabakiak hartzea eta proiektuak desblokeatzea ere esan nahi du. Eta kasu honetan, EH Bilduk eta Elkarrekin Arrasatek kudeaketa-gaitasun falta kezkagarria erakutsi dute”.

Horregatik, EAJ-PNVk udal gobernuari eskatu dio jarduketa horri lehentasuna emateko, izapideak bizkortzeko eta Txiki Txokoaren handitzea 2027-2028ko negurako errealitate bihurtuko dela bermatzeko.