Elgetako EAJ-PNVren udal taldeak 2027ko ordenantza fiskalei egindako ekarpenak aurkeztu ditu, udalerriaren errealitatera egokitutako zerga-sistema bidezkoago eta orekatuago baterantz aurrera egiteko helburuarekin. Jeltzaleek Udalaren jasangarritasun ekonomikoa eta familien, enpresen zein herritar guztien beharrak kontuan hartuko dituen fiskalitatea uztartzearen aldeko apustua egin dute.

Ildo horretan, EAJ-PNVk egokitzat jo du Udal Gobernuak proposatutako % 3ko igoera orokorra, urte arteko azpiko KPIaren % 3,1eko igoerarekin bat datorrelako. Adierazle horrek energiaren eta landu gabeko elikagaien prezioen gorabehera handienak kanpoan uzten ditu.

Iker Laka udal talde jeltzaleko bozeramaileak zerga-politika arduratsua aplikatzearen garrantzia nabarmendu du: “Udalak baliabideak behar ditu kalitatezko zerbitzu publikoak bermatzeko, baina horrek ez du esan nahi edozein igoera justifikatuta dagoenik. Ezinbestekoa da udalaren beharren eta elgetarrei eskatzen zaien ahalegin ekonomikoaren arteko oreka bilatzea”.

Etxebizitza, jarduera ekonomikoa eta fiskalitate progresiboa

Ondasun Higiezinen gaineko Zergari (OHZ) dagokionez, EAJ-PNVk positiboki baloratu du hobarien hobekuntza, iaz taldeak berak eskatutako progresibitateari erantzuten diolako. Hala ere, hutsik dauden etxebizitzei aplikatzen zaien errekargua % 75etik % 150era igotzearen aurka agertu da.

Jeltzaleen ustez, errekargu hori handitzeak, bere horretan, ez du etxebizitzaren arazoa konponduko. Horregatik, neurri osagarriak eskatu dituzte, hala nola etxebizitza-sustapen berriak bultzatzea eta beste erakunde batzuekin lankidetza indartzea.

“Etxebizitzaren arazoa ez da zergak igotze hutsarekin konpontzen. Elgetak benetako etxebizitza-politika behar du, eskaintza handitzeko eta gazteei etxebizitza eskuratzeko aukerak errazteko ekimen zehatzekin”, adierazi du Lakak.

Jarduera ekonomikoari dagokionez, EAJ-PNVk babestu egin du Elgetan ezartzen diren industria-enpresa eta negozioek jardueraren lehen bi urteetan hobariak eskuratzeko eskatzen den gutxieneko langile kopurua hamarretik bostera murriztea. Era berean, 2024an udalerriko enpresen zerga-ikuskapena egiteko lortutako akordioa betetzea eskatu du, udal zergak kalkulatzeko erabiltzen diren elementuak eguneratu eta erregularizatzeko, enpresekin elkarlanean.

Ibilgailuen gaineko zergari dagokionez, talde jeltzaleak ECO eta Zero Emisio ingurumen-bereizgarriak dituzten ibilgailuentzako hobari bereiziak mantentzea proposatu du, ehunekoak bateratu beharrean. Halaber, hobari horiek lau urtera mugatzearekin bat dator, betiere Udalak ofizioz aplikatzen baditu. Eraikuntzen gaineko zergan, berriz, jabekideen erkidegoetako obretarako % 90eko hobari orokorra kentzea proposatu du, fatxadetan, estalkietan eta irisgarritasunean egiten diren jarduketetarako berariazko hobariak dagoeneko badaudelako.

Elgetako benetako kostura egokitutako hondakinen tasa

EAJ-PNVren aldarrikapen nagusietako bat hondakinak bildu eta tratatzeko tasari lotuta dago. Talde jeltzaleak defendatzen du Elgetak bere zerbitzuaren benetako kostuaren arabera ordaindu behar duela, eta ez, bere ustez, udalerriari kalte egiten dion kostuen banaketa-sistema baten bidez.

Horregatik, Udalari eskatu dio Debagoieneko Mankomunitateari eska diezaiola udalerri bakoitzeko hondakinak biltzeko sistema kontuan hartuko duen kalkulu-metodo bat garatzea. Testuinguru horretan, EAJ-PNV bat dator 2027rako hondakinen tasan igoerarik ez aplikatzeko erabakiarekin.

“Ez da bidezkoa elgetarrek jasotzen duten zerbitzuarekin bat ez datozen kostuak bere gain hartu behar izatea. Beharrezkoa da gure herrian hondakinak biltzeak benetan zenbat balio duen jakitea, eta errealitate horretara egokitutako tasa garden bat ezartzea, Antzuolako eta Oñatiko atez ateko bilketa-sistemaren gainkostua ordaindu beharrik gabe”, defendatu du Lakak.

Azkenik, EAJ-PNVk proposatu du Ogasun Batzordean udal tasa eta prezio publikoen azterketa egitea, zerbitzuen benetako kostua zenbateraino estaltzen duten zehazteko. Informazio horrek datozen urteetako Udalaren diru-sarrerak eta gastuak zehaztasun eta zorroztasun handiagoz planifikatzeko aukera emango luke.

Talde jeltzaleak espero du Udal Gobernuak bere ekarpenak kontuan hartzea, eta elkarrizketarako prestutasuna berretsi du, Udalaren egonkortasun ekonomikoa bermatuko duten ordenantza fiskalak onartzeko, betiere herritarren beharrak ahaztu gabe.