Arrasateko EAJ-PNVren udal taldeak laugarren kreditu-aldaketa babestu du Osoko Bilkuran. Aldaketa hori 2025eko ia 16 milioi euroko diruzaintza-gerakinaren zati batekin finantzatuko da. EH Bilduk eta Elkarrekin Arrasatek osatutako Udal Gobernuak proposatutako inbertsioak positibotzat jo dituen arren, proposamena nahikoa ez dela uste du talde jeltzaleak. Horregatik, udalerriarentzat estrategikoak diren proiektuak bultzatzeko, guztira 1,9 milioi euroko bi zuzenketa defendatu ditu.

“Arrasatek behar dituen inbertsioak babesten ditugu, baina ez da nahikoa baliabide ekonomikoak izatea. Ezinbestekoa da plangintza egokia egitea, hartutako konpromisoak betetzea eta proiektuak garaiz gauzatzea. Udal Gobernu honek finantzaketa badu, baina garrantzitsuenean huts egiten jarraitzen du: iragarpenak errealitate bihurtzean”, adierazi du Ander Garay EAJ-PNVren bozeramaileak.

Txiki Txokoa eta Kulturate: berandu datozen beharrezko inbertsioak

Babestutako partiden artean Txiki Txokoaren handitzea eta Kulturateko klimatizazio-sistemaren berritzea nabarmentzen dira, EAJ-PNVk aspalditik eskatzen zituen bi jarduketa.

Txiki Txokoaren kasuan, jeltzaleek gogorarazi dute 2025eko urrian eskatu zutela handitze-lanei lehentasuna ematea, 2026-2027ko negurako prest egon zedin. Hala ere, martxoan lizitazioa hutsik geratu ondoren, Udal Gobernuak hilabeteak behar izan ditu finantzaketa handitzeko, eta horrek familiek beste negu bat itxaron behar izatea ekarriko du. EAJ-PNVk espero du obrak 2027-2028ko negurako amaituta egotea.

Kulturateri dagokionez, klimatizazio-sistema 2025eko urtarriletik dago matxuratuta. 2026ko aurrekontuetan 100.000 euroko partida jasota egon arren, berritze-lanak oraindik ez dira lizitatu. Bitartean, erabiltzaileek eta langileek 32 gradu inguruko tenperaturak jasan behar izan dituzte udan, eta beste negu bati egin beharko diote aurre klimatizazio egokirik gabe.

«Beharrezko inbertsioak dira, baina beranduegi iristen dira. Udal Gobernuak proiektuak iragartzen ditu, baina atzerapenek eta aurreikuspen faltak zuzenean eragiten diete herritarrei», kritikatu du Garayk.

1,9 milioi euro gehiago Gorostizarako eta Udala Goikorako

Aurrekontu-aldaketa osatzeko, EAJ-PNVk bi zuzenketa aurkeztu ditu. Lehenengoaren bidez, Gorostizako igogailuetarako beste 900.000 euro bideratzea proposatu du, proiektuaren bi faseak batera finantzatu eta lizitatu ahal izateko, bigarren fasea etorkizuneko aurrekontu-erabakien menpe gera ez dadin.

Bigarren zuzenketak milioi bat euro gordetzea proposatzen du Udala Goikorako, Arrasaterentzat estrategikoa den proiektu baterako. Jeltzaleek gogorarazi dute Udal Gobernuak diruzaintza-gerakinetik 1,2 milioi euro bideratzeko konpromisoa hartu zuela, eta emandako hitza betetzeko eskatu diote.

EAJ-PNVk ohartarazi du inbertsio horiek orain bermatu behar direla, kontuan hartuta Iturripeko proiektuak eta 36 milioi euroko maileguak etorkizunean eragingo dituzten muga ekonomikoak. Izan ere, mailegu horiek udal kontuak baldintzatuko dituzte datozen 20 urteetan.

“Arrasatek iragarpen gutxiago eta emaitza gehiago behar ditu. Arrasatearren bizi-kalitatea hobetuko duten inbertsioak babesten jarraituko dugu, baina, era berean, hartutako konpromisoak bete daitezela eta proiektuak errealitate bihur daitezela eskatzen jarraituko dugu”, amaitu du Garayk.