Jon Insausti Donostiako alkateak iragarri du aldatu egingo dela lokalen erabilera aldatzeko ordenantza, "lokalak donostiarrentzat etxebizitza bihurtu ahal izateko", eta hori "egungo erronka handienari benetako konponbideak emateko beste tresna bat" dela gaineratu du.

Insaustik iragarri du datozen egunetan kontsulta publiko berri bat irekiko zaiela herritarrei Etxebizitza erabilera bizitegi eraikinetako solairuetan nola ezarri eta lehengo etxebizitzak nola banatu arautzeko udal ordenantza aldatzeko. Araudi hori 2011koa da, eta, beraz, alkateak nabarmendu duenez, "urrunetik datorren korapiloa askatuko dugu donostiarron etxebizitza-premiei irtenbideak bizkortzeko".

Erabilera aldaketei buruzko egungo ordenantza indarrean sartu zenetik, 133 lokal bihurtu dira etxebizitza. Etxebizitzarako sarbidea atari barrutik egin behar izatea izan da muga handiena. Ordenantza aldatzearekin batera, Udalak azterketa sakona egin du eta kalez kale aztertu ditu bide publikotik zuzenean sar daitezkeen eraikinak.

Gainera, Etxebizitzaren Behatokiaren arabera, Donostian 35 m2-tik gorako 5.494 lokal daude gaur egun beheko solairuan (industrialdeetan eta merkataritza-guneetan kokatutako lokalak kanpoan geratzen dira). Horietatik 860 jarduerarik gabe daude, hau da, % 15,7. Martutene, Ategorrieta-Ulia, Añorga edo Altza auzoek nabarmen gainditzen dute ehuneko hori, lokal hutsak % 30 baino gehiago baitira.

Alkateak gaineratu duenez, "esan genuen ausartak izan behar genuela etxebizitza-sustapen berriak bultzatzeko orduan (eta hala izaten ari gara Auditz Akular bezalako adibideekin), baina, era berean, bizkorrak eta abilak izan behar genuela eraikitako hirian jarduteko. Bada, hori da horren adibide, eta ez dugu minutu bat ere galduko donostiarrei etxebizitza eskuratzeko irtenbideak bizkortzeko eta bultzatzeko orduan”.