Jon Insausti Donostiako alkateak hauteskunde orokorren deialdiaren aurrean "ez despistatzeko" deia egin du gaur, eta "Espainiatik datorkigun zarata alde batera utzi eta Donostiako erronkei heltzeko deia" egin du, "donostiarron erronkak baitira".

Jon Insaustiren arabera, "kanpotik datorren zaratak ez du hiri hau geldituko, gainera, bere etorkizuna diseinatzeko une erabakigarrian sartu da, proiektu nagusiei abiadura sartu diegulako". Hiriko garai garrantzitsu horren erakusgarri, urrian bertan jorratzen ari diren hiru eztabaida garrantzitsu aipatu nahi izan ditu, lana eta erabakiak eskatzen dituztenak: aurrekontuak, Hiri Antolamenduko Plan Orokorra eta Politika Orokorreko Osoko Bilkura.

Alkateak Aurrekontuak aipatu ditu zerbitzu publikoak indartzeko eta donostiarren bizi-kalitatea hobetzeko tresna gisa. “Madrildik datorkigun giro kutsatutik urrundu nahi dut, eta elkar ulertzeko deia egin, kontu onbideratuak izateko, ekonomia sendoa izaten jarraitzeko eta bizitoki-arazoari erantzuteko. Donostiar erara akordioak lortzeko deia", gaineratu du Insaustik.

Historiako konturik sozialenak direla errepikatu du, "gehien behar dutenei konponbideak bizkortzeko egin dugun ahaleginaren adibide, humanismoa eta exijentzia uztartuz, inor atzean gera ez dadin. 17,6 milioi erabiliko ditugu adinekoei arreta emateko (348,77 euro 65 urteko edo gehiagoko donostiar bakoitzeko) eta beste 14 milioi bazterkeria-egoeran dauden pertsonei laguntzeko (ia 500 euro pertsona bakoitzeko). Ildo horretan, gogorarazi du "akordio zabalak lortzeko garaia" dela, "beste leku batzuetan aldarrikatzen dena, hemen jada jasota daukagulako".

Alkateak adierazi du prest dagoela alderdi guztien ekarpenak jasotzeko, elkarrizketa-erronda bat hasiko dela iragarri du eta gogorarazi du zuzenketak aurkezteko fase bat ireki dela. "Eztabaida osasuntsua" izatea espero duela adierazi du, "demagogiarik eta populismorik gabekoa, hauteskundeen testuinguruak desitxuratuko ez duena".

Hilaren 14ko Politika Orokorreko Osoko Bilkura aipatu du, lehentasunezko gaiez gain (etxebizitza eta segurtasuna), eguneroko ekonomiaren alderdia aipatuko duela azpimarratzeko: “Donostiarraren poltsikoa, erosketa-saskiaren garestitzea, etxe bakoitzeko ekonomia. Hor ere ez dugu denborarik galtzeko, eta neurriak azkartu behar ditugu herritarren egunerokotasunari laguntzeko".

Azkenik, Hiri Antolamendurako Plan Orokorrari dagokionez, honako hau azpimarratu du: "Donostiako eremu askotan, hiria hobetzeko ekimenak gauzatzeko, etxebizitza berrien bidez donostiarrentzako bizi-proiektuak bultzatzeko, auzo biziak eta konektatuak eraikitzeko, espazio atseginak sortzeko eta, azken finean, herritarren bizi-kalitatea hobetzeko aukerak ditugu. Horregatik, azeleragailua zapaldu eta beste leku batzuetara begira ez geratzeko garaia da. Hurrengo hamarkadetako Donostia diseinatzeko behar den dokumentuaren tramitazioa azkartu behar genuen, eta Hiri Antolamenduko Plan Orokorraren idazketa abiarazi dugu. Orain da garaia diseinu hori adosteko donostiar guztien artean. Gelditu gabe. Denborarik galdu gabe".