Hondarribiko EAJ-PNVk iraileko osoko bilkuran herriaren interesen defentsan, baliabide publikoen kudeaketa arduratsuan eta erantzukizunean oinarritutako politika aldarrikatu zuen. Jeltzaleek udal gobernuaren hainbat erabaki kritikatu zituzten, herritarrengan izan dezaketen eraginagatik.

Damarri eta Mouriscot inguruko etxebizitzak babesteko aho bateko akordioa

Udal talde guztiek mozio bat sinatu zuten Damarri eta Mouriscot inguruko etxebizitzak babesteko legeak ahalbidetzen dituen bide guztiak aztertzeko. EAJ-PNVrentzat, ezinbestekoa da eskuragarri dauden aukera juridiko guztiak lantzea eta etxebizitza horien egoerak sortzen duen kezkari erantzutea.

Tasak gora, aurrekontuaren zati handi bat gauzatu gabe

EAJ-PNVk udal gobernuak proposatutako tasen igoera berria kritikatu zuen. 2025eko Kontu Orokorraren azterketan, gastuen aurrekontuaren gauzatze-maila % 72,08koa izan zela nabarmendu zuen: 11,6 milioi euro baino gehiago gastatu gabe geratu ziren.

Bestalde, EAJ-PNVk balioan jarri zuen Hondarribiak turismo-tasaren bidez diru-sarrera berriak jasotzeko aukera. Alkateak berak adierazi zuen tasa horrek urtean 700.000 eta milioi bat euro arteko diru-sarrerak ekar diezazkiokeela Udalari.

EAJ-PNVren ustez, diru-sarrera horiek herriaren egunerokoan ere islatu behar dira: kaleen eta espazio publikoen garbiketan, mantentze-lanetan eta udalerriaren zaintzan. Herritarrei zerga-ahalegin handiagoa eskatu aurretik, Udalak dituen baliabideak hobeto aprobetxatu eta diru-sarrerak arduraz kudeatu behar ditu.

Udal eraikinen garbiketa: Abotsanitzek azaldu beharreko kontraesana

Udal eraikinen garbiketa-zerbitzuaren kontratazioari buruzko eztabaidan, EAJ-PNVk lizitazioaren alde bozkatu zuen, ezinbesteko zerbitzua dela iritzita. Hala ere, Abotsanitzen diskurtsoaren eta egungo jardunaren arteko kontraesana agerian utzi zuen.

2021ean, oposizioan zegoela, Abotsanitzek garbiketako langileak zuzenean Udalak kontratatu behar zituela defendatzen zuen, azpikontratazioa arrazoi ideologiko eta ekonomikoengatik baztertuz. Orain, gobernuan dagoela, kanpoko kontratazio berri bat bultzatu du.

EAJ-PNVk gogorarazi zuen kontratuaren urteko kostua aurreko lizitazioarekin alderatuta % 30 inguru igo dela, eta igoera horrek zerbitzuaren kalitatean eta langileen lan-baldintzetan hobekuntza eragin behar duela eskatu zuen. Halaber, hitzarmen kolektiboa berritzeko garaia hurbiltzen ari denez, gobernuari elkarrizketa eta negoziazioa sustatzeko eskatu zion, langileen ordezkariekin batera.

Zaldunborda: Udalaren interesak defendatu eta gertatutakoa argitu

EAJ-PNVk Zaldunbordaren auzian kereila penala aurkezteko proposamenaren alde egin zuen. Jeltzaleen ustez, lehentasuna Hondarribiko Udalaren interesak defendatzea da, eta udal aholkularitza juridikoak egokitzat jotzen dituen bideak erabiltzea gertakariak argitzeko. Horrek ez du esan nahi susmoak frogatutzat ematen direnik edo inoren erantzukizuna aurrez erabakitzen denik; hori epaitegiei dagokie.

EAJ-PNVk gogorarazi zuen 2025ean ohartarazi zuela Hiri Antolamenduko Plan Orokorrean egindako aldaketak funtsezkoak zirela eta segurtasun juridikoari buruzko zalantzak sor zitzaketela. Jeltzaleen iritziz, egoera honek hirigintza-erabakiak berme juridiko guztiekin hartzearen garrantzia azpimarratzen du.

E21 eta E25 lineen maiztasunak mantentzea

Azkenik, EAJ-PNVk Gipuzkoako Foru Aldundiko Mugikortasun Sailari egindako eskaera babestu zuen, E21 autobus-linearen —autopistatik zuzeneko lotura eskaintzen duenaren— eta Hondarribia eta Irun lotzen dituen E25 linearen maiztasunak ez murrizteko. Jeltzaleek egungo maiztasunak mantentzearen garrantzia azpimarratu zuten, herritarrek erabiltzen dituzten garraio publikoko loturak okertu ez daitezen.