Aretxabaletako EAJ-PNV berriro ere bere desadostasuna agertu du EH Bilduren Udal Gobernuak bultzatutako mugikortasun aldaketen aurrean, eta hartutako neurriak berrikustea eskatu du. Era berean, etorkizuneko aldaketak ezarri aurretik herritarrekin parte-hartze eta kontraste prozesu zabalagoa egiteko beharra azpimarratu du.

Talde jeltzalearen iritziz, azken hilabeteetan egindako zenbait jarduketek ez dituzte lortu mugikortasun plan batek izan beharko lituzkeen helburuak, eta kontrako ondorioak izan dituzte zenbait arlotan: bide-segurtasunean, zirkulazioan eta garraiobide ezberdinen arteko bizikidetzan, oinezkoari lehentasuna emanez.

EAJ-PNVren kezka nagusietako bat Araba Ibilbidearen inguruan sortutako egoera da. Talde jeltzalearen ustez, aparkaleku berriak sortzeak ibilgailuen pilaketa handiagoa eragin du, eta pertsonentzako espazio seguruago eta atseginagoa izan beharko lukeen eremua oztopoz bete du.

Aldaketa horiek honako ondorio hauek izan dituzte:

   • Oinezkoentzat: ez da espazio gehiago irabazi.

   • Araba Ibilbidea: aparkalekuz bete da, lehen espazio irekiagoa eta atseginagoa zen etorbide bat oztopoz betetako kale bihurtuz.

   • Mugikortasuna: zenbait ibilbide egiteko distantzia eta beharrezko denbora nabarmen handitu dira.

“Mugikortasunari buruzko erabakiek herritarren bizi-kalitatea hobetzeko balio behar dute, ez zalantza gehiago, zirkulazio arazoak edo arrisku egoerak sortzeko. Aretxabaletak pertsonengan oinarritutako mugikortasuna behar du, zorroztasunez planifikatua eta adostua”, adierazi du EAJ-PNVko udal taldeak.

Era berean, talde jeltzaleak kritikatu du noranzko aldaketak eta zirkulazioaren inguruko neurriak herritarrekin behar adina kontrastatu gabe aplikatu izana. Zentzu horretan, hainbat bizilagunek adierazitako harridura eta desadostasuna herritarrak gehiago entzun behar direla erakusten dutela uste du, bereziki udalerriaren egunerokoan eragina duten eta baliabide publikoen gastua dakarten erabakietan.

“Mugikortasun aldaketek eragin zuzena dute pertsonen eguneroko bizitzan. Horregatik, ezinbestekoa da neurriak ondo azaltzea, haien ondorioak ebaluatzea eta funtzionatzen ez duen hori zuzentzea. Gobernatzea ere bada entzutea eta beharrezkoa denean zuzentzea”, adierazi dute EAJ-PNV Aretxabaletatik.

Horrez gain, talde jeltzaleak kezkatuta agertu da seinaleztapenaren eta behin-behineko moduan aurkeztutako zenbait neurriren inguruan. Haien ustez, aldaketa batzuek nahasmena sor dezakete gidarien artean eta ez dute behar bezala bermatzen irisgarritasuna eta segurtasuna.

Egoera horren aurrean, Aretxabaletako EAJ-PNVk Udal Gobernuari eskatzen dio ezarritako aldaketak ebaluatzeko eta herritarrekin entzute prozesu bat zabaltzeko, neurri horien funtzionamendua aztertzeko eta beharrezko hobekuntzak egiteko.

“Mugikortasun iraunkorra ez da soilik paper gaineko aldaketen bidez eraikitzen. Planifikazioarekin, elkarrizketarekin eta Aretxabaletan bizi eta mugitzen diren pertsona guztientzat funtzionatuko duten irtenbideekin eraikitzen da”, amaitu du talde jeltzaleak.