Amasa-Villabonako EAJ-PNV udal taldeak salatu du udal Idazkaritzaren egoeraz publikoki ohartarazi zuenetik lau hilabete igaro badira ere, arazoak konpondu gabe jarraitzen duela eta gaur egun lanpostu horri dagozkion eginkizunak Udaleko Administrazio Orokorreko Teknikariak bere gain hartzen dituela.

EAJ-PNVren ustez, egoera horrek agerian uzten du EH Bilduren udal gobernuak ez diola oraindik erantzun egonkorrik eman urteetan luzatzen ari den arazo bati. Talde jeltzaleak gogorarazi du titularra zen idazkaria 2014an jubilatu zela eta, 2020tik hona, behin-behineko lau idazkarik utzi dutela lanpostua. Gainera, plaza Administrazio Publikoko langileen egonkortze prozesuan sartu bazen ere, prozesua gainditu zuten pertsonetako inork ez zuen azkenean lanpostua betetzeko hautua egin.

“Maiatzean ohartarazi genuen kanpoan errudunak bilatzeari utzi eta kudeatzen hasteko garaia zela. Lau hilabete igaro dira eta oraindik ez dago behin betiko irtenbiderik. Orain udaleko legelaria bera ari da Idazkaritzako eginkizunak betetzen, eta horrek erakusten du arazoa, konpondu beharrean, luzatzen ari dela”, adierazi du Eneko Urdangarin Amasa-Villabonako EAJ-PNVko bozeramaileak.

EAJ-PNVk azpimarratu du bere kritika ez dela inola ere udal langilearen aurkakoa, udal gobernuaren kudeaketa politikoari buruzkoa baizik. “Udal langileen ahalegina eta profesionaltasuna baloratzen ditugu. Horregatik, ez dugu uste behin-behineko egoera batek Udalaren funtzionamendurako funtsezkoa den lanpostu bat betetzeko ohiko modua bihurtu behar duenik”, gehitu du Urdangarinek.

Talde jeltzaleak gogorarazi du, halaber, Eusko Jaurlaritzak zein Gipuzkoako Foru Aldundiak prestutasuna agertu zutela irtenbide bat bilatzeko elkarlanean aritzeko. Horregatik, EH Bilduri eskatu dio azal dezala zer kudeaketa egin dituen hilabete hauetan, zer aukera planteatu dituen eta zer urrats ematea aurreikusten duen Idazkaritzaren estaldura egonkorra bermatzeko.

“Udal batek egonkortasuna, plangintza eta administrazio-egitura sendoa behar ditu espedienteak izapidetzeko, inbertsioak bultzatzeko eta zerbitzuak normaltasunez eskaintzeko. Gobernatzea arazoak konpontzea da, ez hilabeteetan zehar arazoak luzatzen uztea”, amaitu du Urdangarinek.

EAJ-PNVk udal gobernuari eskatu dio gai hau lehentasunezko bihurtzeko eta eskura dituen bide guztiak aktibatzeko, udal Idazkaritzaren funtzionamenduan normaltasuna lehenbailehen berreskuratzeko.