Oiartzungo EAJ-PNV udal taldeak Ertzaintzaren eta udaltzaingoen aldeko mozio bat eramango du uztailaren 29ko ohiko Osoko Bilkurara, baita Urmendiko 2 urteko gelaren etorkizunari buruzko galdera sorta bat ere.

Mozioaren helburua da herritarren segurtasunaren alde lan egiten dutenei babes instituzionala ematea eta polizia-kidego horietara sartzeko prestatzen ari diren agenteek eta gazteek jasan dituzten mehatxuak, irainak, seinalatzeak eta jazarpen-ekintzak gaitzestea. EAJ-PNVren ustez, segurtasuna eta erakundeekiko errespetua bermatzen dutenak defendatzea elkarbizitza demokratikoa defendatzea ere bada.

Talde jeltzalearen bigarren gaia Urmendiko 2 urteko gelaren egoera izango da. EAJ-PNVk hainbat galdera egingo dizkio Udal Gobernuari, 2026-2027 ikasturtean zerbitzua nola antolatuko den argitzeko eta kaltetutako familiei ziurtasunak eskaintzeko.

Besteak beste, taldeak informazioa eskatuko du kudeaketa-ereduari buruz, zerbitzuaren estaldura juridikoari buruz, Udalak bere gain hartuko duen kostuari buruz, txosten tekniko eta ekonomikoei buruz, jantokiaren eta jolas-espazioen antolaketari buruz, azken hilabeteetan familiei helarazitako informazioari buruz eta aukera-berdintasuna bermatzeko eta segregazio-egoerak saihesteko aurreikusitako neurriei buruz.

Gainera, EAJ-PNVk gogorarazi du espediente horrekin lotutako dokumentazio guztia eskuratzeko eskatu duela, Udal Gobernuak hartutako erabakiak zehatz-mehatz aztertu eta eskura duen informazio guztiarekin kontrol lana egin ahal izateko.

Janire Mitxelena udal taldeko bozeramaileak adierazi duenez, "familiek erantzun argiak behar dituzte, hilabeteetako ziurgabetasunaren ondoren. Udal Gobernuak datorren ikasturtean zerbitzua nola emango den azaldu behar du, zein erabaki hartu dituen orain arte eta zein bermerekin ".

Mozioari dagokionez, Mitxelenak azpimarratu du "inork ez duela mehatxurik edo larderiarik jasan behar Ertzaintzaren edo udaltzain baten parte izatea erabakitzeagatik. Uste dugu garrantzitsua dela egunero herritar guztien segurtasunaren alde lan egiten dutenei babes mezu argi bat helaraztea eta gizarte demokratiko batean merezi duten errespetua berrestea."