Goierriko EAJ-PNVk informazio hitzaldi bat antolatu zuen uztailaren 21ean Altzagako Ertoetxe eraikinean, Gipuzkoako Foru Aldundia udalerri txikien etorkizuna indartzeko bultzatzen ari den ekimenen berri emateko, arreta berezia jarriz etxebizitza politiketan.

Saioan Joseba Aranburu Gipuzkoako Foru Aldundiko Lurralde Oreka Berdeko zuzendariak eta Maite Peñacoba Etorlur sozietate publikoko zuzendariak parte hartu zuten, eta Landagipuzkoa programaren lan ildoak eta 1.000 biztanletik beherako herrietan etxebizitza babestua sustatzeko estrategia azaldu zituzten.

Hitzaldian nabarmendu zen etxebizitza eskuratzea erraztea funtsezko tresna dela biztanleria finkatzeko, belaunaldien arteko erreleboa bermatzeko eta udalerri txikiak bizirik mantentzeko. Era berean, adierazi zen Altzaga programa horren barruan aukera berriak aztertzen ari diren herrien artean dagoela.

Topaketaren amaieran, galderen txanda egin zen, eta bertaratutakoek zalantzak eta kezkak helarazi ahal izan zituzten, landa udalerrien etorkizunerako erronka nagusietako bati buruzko elkarrizketa gune bat sortuz.