Usurbilgo EAJ-PNV udal taldeak salatu du udal gobernuak plangintza falta nabarmena duela terrazetako ordenantzaren inguruan, azken udal batzordean ez baitzuen erantzun argirik eman ordenantza hori onartzeari buruz.

EAJ-PNVk gogorarazi du udal gobernuak hiru urte inguru daramatzala ordenantza hori lantzen ari dela iragartzen; hala ere, gaur-gaurkoz, Usurbilek ez du oraindik espazio publikoan terrazak antolatzeko araudi espezifikorik. “Batzordean galdetu genuen ordenantza zein puntutan zegoen, zer lan egin ziren ordura arte eta zer egutegi zuen udal gobernuak. Erantzuna betiko dinamika bera izan zen berriro ere: azalpen lausoak eta datarik eza”, adierazi dute talde jeltzaletik.

EAJ-PNVren ustez, egoera honek udal gobernuaren utzikeria kezkagarria agerian uzten du. Talde jeltzalearen iritziz, bereziki larria da eguneroko bizikidetzari, tokiko jarduera ekonomikoari, ostalaritzari, auzotarren atsedenari eta irisgarritasunari zuzenean eragiten dion gai batek urteetako iragarpenen ondoren kajoi batean jarraitzea.

“Hiru urte igaro ondoren, Usurbilek zain jarraitzen du. Eta udal gobernu batek neurri bat urteetan iragarri eta gero gauzatzen ez duenean, arazoa ez da teknikoa: politikoa da. Lehentasun falta da, kudeaketa falta da eta konpromiso falta da”, salatu dute.

EAJ-PNVk defendatzen du ordenantza oreka bilatuz landu behar dela, eragile guztiak entzunda: ostalaritza, auzotarrak, mugikortasun urriko pertsonak eta espazio publikoaren erabiltzaileak. “Horregatik da beharrezkoa araudi argi, garden eta guztiontzat ezaguna izatea. Ez inoren aurka egiteko, baizik eta denek jakin dezaten zein diren joko-arauak”, azaldu dute.

Udal taldeak deitoratu du udal gobernuak atzerapenez atzerapen funtzionatzen jarraitzea. “Usurbilek ez du aitzakia gehiagorik behar. Kudeaketa behar du”. Azkenik, EAJ-PNVk udal gobernuari eskatu dio, 3 urteren ondoren aurkez dezala behingoz proposamen serio, landu eta adostu bat. “Zoritxarrez, gai honetan udal gobernua berandu dator berriro”, ondorioztatu dute