Ekainaren 24ko San Juan zaindariaren jaia eta egungo bero boladaren ondorioz tenperatura altuko egoera bat datozela ikusita, Arrasateko EAJ-PNVren udal taldeak Udal Gobernuari eskatu dio salbuespenezko neurriak har ditzala herritarren ongizatea bermatzeko, bereziki haurren, adinekoen eta kolektibo zaurgarrien ongizatea bermatzeko.

Ildo horretan, talde jeltzaleak bi proposamen zehatz jarri ditu mahai gainean:

●  Batetik, udalerriko kanpoko igerilekuak, ekainaren 24ko San Juan egunean itxita egoteko aurreikusita daudenak, salbuespen gisa egun horretan ireki ahal izatea, aisialdirako alternatiba bat eskaintzeko eta beroaren ondorioak arintzeko.

●  Bestetik, bero boladak irauten duen bitartean, udalerriko ur txorroten parkeak 23:00ak arte aktibo mantentzea proposatzen da, ohiko ordutegia luzatuz.

Talde jeltzaleak azpimarratu du neurri errazak direla, berehala aplikatu daitezkeenak eta inpaktu handikoak, batez ere gero eta muturreko testuinguru klimatikoan.

“San Juan oso egun berezia da Arrasaterentzat, baina ezin dugu ahaztu tenperatura altuek jaiaz gozatzea baldintzatu dezaketela eta osasunerako arriskutsua izan daitekeela. Udal baliabideak errealitate horretara egokitzea erantzukizun eta sen oneko kontua da”, adierazi du Ander Garay EAJ-PNV Arrasateko bozeramaileak.