EAJ-PNVk argi utzi du zaintza politikan Gipuzkoak baduela norabide partekatu eta sendo bat, urteetan zehar eraiki eta garatu dena, eta helburu nagusi bat duena: pertsona guztien ongizatea bermatzea, bereziki mendekotasun egoeran dauden pertsonena eta haien familienena.

Gipuzkoako Batzar Nagusietako osoko bilkuran, Anton Elosegi batzarkide jeltzaleak adierazi duenez, “ez gara hutsetik abiatzen”. Gipuzkoak badu zaintza eredu sendo bat, EAJ-PNVk bultzatu eta garatzen lagundu duena, pertsonak erdigunean jarrita eta arreta etxean, ingurune komunitarioan eta zerbitzu publikoen sarean uztartuta. “Lurralde honek bide propioa egin du, baina ez norabiderik gabeko bide bat: autonomia pertsonala, etxeko arreta, eguneko zentroak, etxez etxeko laguntza eta komunitatean bizitzeko aukera indartzearen aldeko hautu politiko kontziente baten ondorioa da”, nabarmendu du.

Ildo horretan, Elosegik gogorarazi du Gipuzkoa erreferente izan dela LPPEren (Laguntza Pertsonalerako Prestazio Ekonomikoaren) garapenean, bai kopuruetan, bai prestazioaren kalitatezko bilakaeran. Prestazioa kontratu laboral eraginkorrarekin lotzea, laguntzaile pertsonalaren profesionalizazioa bultzatzea eta zerbitzuaren kalitatea bermatzea zaintza eredu beraren adierazpen zehatzak; hain zuzen ere, autonomia gehiago, arreta hobea eta pertsonen bizi-proiektua errespetatzeko tresna eraginkorragoak eskaintzea.

EAJ-PNVren ustez, prestazioen inguruko edozein aldaketa ezin da modu isolatuan aztertu, ezta unean uneko planteamendu partzialen arabera ere, EH Bilduk egin duen bezala. “LPPEk eta FIZPEk (Familia Inguruneko Zaintzarako Prestazio Ekonomikoak) izaera ezberdina dute, eta ondorio ezberdinak sortzen dituzte zaintza ereduan”, azaldu du Elosegik. LPPEk autonomia pertsonala eta laguntza profesionalizatua indartzen dituen bitartean, FIZPEk lotura zuzenagoa du familia inguruko zaintzarekin. Horregatik, “igoerez hitz egiten dugunean, zer sustatzen ari garen ere galdetu behar diogu geure buruari: autonomia eta profesionalizazioa, ala, nahi gabe bada ere, zaintzen familiarizazioa; askotan emakumeen bizkar geratzen den eredua”.

Mendekotasuna duten pertsonen eta familien beharrei erantzuteak seriotasuna, ebaluazioa eta sistema osoaren ikuspegia  eskatzen ditu. Horregatik, jeltzaleek ez dute bat egin EH Bilduren planteamenduarekin, demagogiaren bidetik jotzen duelako, ez baita proposatzen gauzagarria, nahiz eta eztabaida titular errazetara eraman. Gipuzkoako zaintza sistemaren konplexutasuna, neurri horien eragin ekonomikoa, soziala eta antolakuntzazkoa behar bezala neurtu behar dira. “Zaintza sistema baten sendotasuna ez da neurtzen iragarpen azkarretan edo titular errazetan, baizik eta erabakiak datuekin, erantzukizunez eta sistema osoaren oreka zainduz hartzeko gaitasunean”, defendatu du Elosegik.