Arrasateko EAJ-PNVk salatu du EH Bilduren Udalak ez duela behar adinako plangintzarik eta exekuziorik udalerriko errepide sarearen egoerari dagokionez. “Errepideen asfaltatze gabezia errealitate nabarmena da, eta arrasatearren segurtasuna arriskuan jartzen du”, nabarmendu du Ander Garay bozeramaile jeltzaleak.

Arrasateko Udalak iaz lau urtez urtean 220.000 €-ko asfaltatze-lanen kontratua egin zuen arren, EAJ-PNVk uste du kopuru hori ez dela nahikoa eta ez diela erantzuten errepide sarearen benetako beharrei. “Bi urteko exekuzioaren ondoren, errepideak egoera negargarrian daude, eta horrek agerian uzten du azpiegitura hobetzeko konpromisorik eza”.

EAJ-PNVk aurkeztutako datuen arabera, kontratuan adostutako zenbatekotik (440.000 € azken bi urteetan) 353.848,48 € baino ez dira inbertitu, hau da, aurreikusitakoaren % 80. Gabealdi horrek zenbatekoaren %20 exekutatu gabe utzi du.

Nafarroa Etorbidearen eta Arrasate Pasealekuaren egoera kritikoek berehalako esku-hartzea eskatzen dute. "Bide segurtasuna ez dago bermatuta errepideen egungo egoerarekin, eta, beraz, premiazkoa da bide horien asfaltatze lanak 2026an egitea, urtearen amaierara arte itxaron gabe, eta aurtengo kontratua otsailean esleitzea eskatzen dugu", adierazi du EAJ-PNVko bozeramaileak.

Asfaltatzeko esparru kontratua 2024an esleitu zen, lau urterako 880.000 €-ko aurrekontuarekin, baina EAJ-PNVren udal taldeak uste du “ez direla baliabideak behar bezala planifikatu, eta ez dela behar adina bideratu egoeraren benetako beharrei erantzuteko. EH Bilduren Udal Gobernu erreaktiboa izaten jarraitzen dugu, ez proaktiboa”.

Jeltzaleek azpimarratu dute Udal Gobernuaren egungo ikuspegia zuloetan "adabakiak" egitera mugatzen dela, eta hori ez dela irtenbide egokia. "Beharrezkoa da asfaltatze plan erreal eta eraginkor bat izatea, epe labur, ertain eta luzera, gaur egun existitzen ez dena", adierazi dute.

EAJ-PNVk asfaltatze lanak burutzeko inbertsio handiagoa eskatu du, eta nabarmendu du urtero 220.000 € baino gehiago bideratu beharko direla zeregin horretara, Udalak urtero legea betez zenbat gehiago inbertitu dezakeen aztertzeaz gain. Halaber, Nafarroa Etorbidea eta Arrasate Pasealekua hobetzea eskatzen du, Gaztelupetik Arimazubiraino, 2026ko kontratuan, lanak otsailean lizitatzen hasita. Era berean, 2028tik aurrera asfaltatze kontratu berri bat planifikatzeko behar diren baliabide guztiak jartzea eskatzen du, urtean 400.000 €-tik gorako inbertsioarekin, eta datozen 10 urteetarako asfaltatze plan zehatz bat egitea, arazoak prebenitzeko eta errepide sarea baldintza egokietan mantentzeko.

EAJ-PNVren udal taldeak azpimarratu du “ondo mantendutako errepide sarea funtsezkoa dela arrasatearren segurtasuna bermatzeko. Beharrezkoa da prebenitzea eta edozein ezbehar gertatu aurretik jardutea, inbertsio falta eta utzikeria nabarmenak baitira EH Bilduren Udal Gobernuaren partetik gure egunerokoan", amaitu du Garayk.