EAJ-PNV Arrasatek baikor baloratu du Udal Gobernuak Parte-hartzeko Ordenantza bat garatzeko iragarpena, baina gogorarazi du ekimen hau bi urtez geldirik egon dela EH Bildu eta Elkarrekin Arrasateren erabakiz. Jeltzaleek nabarmendu dute aurrekontu parte-hartzaileak ezabatu eta herritarren parte-hartzea informaziora mugatu ostean, Udal Gobernuak orain aukera duela herritarren inplikazioarekiko benetako konpromisoa erakusteko erabaki-prozesuetan.

Beharrezko jarrera-aldaketa

Martxoaren 4ko osoko bilkuran, Garazi Etxeberria Hirigintza zinegotziak iragarri zuen Udalak Parte-hartzeko Ordenantza bat garatuko zuela. EAJ-PNV Arrasateren iritziz, aldaketa hau positiboa da: "pozik gaude ekimen hau berreskuratzea erabaki dutelako, baina gogoratu behar da haiek izan direla ordenantza-prozesua kutxa batean gordeta mantendu dutenak", adierazi du Ander Garay bozeramaile jeltzaleak.

Jeltzaleek azpimarratu dute herritarren parte-hartzea ezin dela informazioa zabaltzera soilik mugatu. "Informazioa ematea prozesuaren parte bat baino ez da; benetako parte-hartzea herritarrekin erabaki-esparruak partekatzea, dinamika parte-hartzaileak sortzea eta udal erabakietan erantzukidetasuna sustatzea da", nabarmendu du Garayk.

Bi urte benetazko parte-hartzerik gabe

Legegintzaldiaren hasieratik, EAJ-PNV Arrasatek parte-hartze erreal bat sustatzeko beharra aldarrikatu du, lehendik dauden tresnak mantendu eta indartuz, eta erabakiak hartzeko espazio eta mekanismo berriak sortuz. Hala ere, azken bi urteetan, EH Bildu eta Elkarrekin Arrasateko Gobernuak aurrekontu parte-hartzaileak ezabatu ditu, aurreko bi legealdietan alderdi guztien babesa izan zuten eta herritarrei beren proiektu propioak sustatzeko aukera ematen zieten tresna.

Kontrara, aurreko EAJ-PNV-PSE gobernuak prozesu parte-hartzaile bat jarri zuen martxan ordenantza bat herritarrekin eta udal talde guztiekin elkarlanean egiteko. "Orain aukera dugu lan hori berreskuratzeko eta amaitzeko, indar politiko guztien eta herritarren inplikazioarekin", adierazi du Garayk.

Prozesu irekia eta gardena eskatzeko beharra

EAJ-PNV Arrasatek espero du etorkizuneko Parte-hartzeko Ordenantza tresna erreal eta eraginkorra izatea, herritarren ekimenez bultzatua eta erabakiak hartzeko prozesuetan herritarren parte-hartzea indartzeko bideratua. Horretarako, jeltzaleek honako hauek eskatzen dituzte:

         ● Ordenantza egiteko prozesuan udalbatza osatzen duten alderdi guztiek parte hartzea, baita arrasatearrek ere.

         ● Aurrekontu parte-hartzaileak bezalako funtsezko mekanismoak berreskuratzea, baliabide egokiekin hornituta.

         ● Parte-hartze espazio berriak sortzea, hala nola auzo bilerak aurrekontuak egiteko edo Hirigintza Aholku Batzordeari mugikortasun gaietan erabaki ahalmena ematea.

"Azken bi urteetan ezarri den inposiziotik erabaki partekaturako espazioak sortzera igarotzea da erronka nagusia. Ordenantza honek gobernu ireki eta parte-hartzaileago baterantz aurrera egiteko balioko duela espero dugu, herritarrek erabaki-prozesuetan benetako protagonismoa izan dezaten", amaitu du Garayk.