Abotsanitzek komunikazioen tonua "zaintzeko" eskatzen digun eta "albiste faltsuak" sortzea leporatzen diguten aldi berean, Kasino Zaharreko kafetegiaren irekiera aprobetxatzen dute azken urteetan gertatutakoari buruz gezur lotsagabeak esateko.

Lehenik eta behin, esan nahiko genuke gure udal taldea oso pozik dagoela kafetegiaren irekierarekin, eta zorte handia opa diogula zerbitzuaren arduradun berriari. Badakigu gune hori oso garrantzitsua dela Kasino Zaharraren erabiltzaileentzat. Horregatik, aurreko agintaldian ere lan egin genuen espazioa hobetzeko eta zerbitzuaren lizitazioa hasteko beharrezko urratsak emateko.

2020ko martxoan pandemia eta ixteko betebeharra iritsi zirenean, ordura arte kafetegia kudeatzen zuen enpresarekin harremana eten behar izan zen. Enpresarekin egiten zen kontratazioagatik, ezin izan zitzaion kontratuari geroago ekin.

Une horretan, Gizarte Zerbitzuetako sailak, Gotzone Larrarte zinegotzia buru zela, eta udaleko beste sail batzuek (Kontratazioa, Idazkaritza edo Zerbitzu Teknikoak) hainbat lan hasi zituzten eraikina eta Kasinoko erabiltzaileek erabili ohi zituzten espazioak hobetzeko 

Kasino Zaharraren irisgarritasuna hobetzeko lanak egin ziren, eraikinera gurpil-aulki batekin sartu ahal izateko. Bertara sartzea errazteko elementuak jarri ziren, erabiltzaileek eskatuta. Teilatuaren eta fatxadaren zati bat berritu zen, segurtasun-arazoak ekiditeko. Kafetegirako altzari berriak erosi ziren eta Kasino Zaharreko hainbat gunetako ekipamendua ere berritu zen.

Zerbitzu teknikoek beharrezko izapideak egin zituzten eraikinak dagokion jarduera-baimena izan zezan. Era berean, taberna-kafetegiaren etorkizuneko jarduerarako azterketa ekonomiko eta finantzario bat egin zen (IKEI enpresarekin). Izan ere, azterketa hori eskatu zuten oposizioko zinegotziekin partekatu zen.

Behin-behinean, erabiltzaileek eskatuta, taberna-kafetegiaren garbiketa integrala egin zen, eta espazioa "vending" motako makinekin prestatu zen, instalazioak erabili ahal izateko eta berriro ere gizarteratzeko leku bat izateko. Urrats horiek guztiak Kasino Zaharreko Elkartearekin etengabeko komunikazioan eta lankidetzan eman ziren beti.

Eta bilera tekniko-politiko ugari egin ziren zerbitzuaren lizitaziorako formulak baloratzeko eta aztertzeko. Agian hori guztia aldez aurretik eginda zegoelako, gobernu-talde berria kontratazio-pleguak egiten hasi ahal izan zen iritsi bezain pronto. Aldez aurretik lizitazio- espedientea hasteko behar zen lan guztia egina zegoelako.

Horregatik guztiagatik, ezin dugu onartu aurreko gobernu-taldeari eta orduko zinegotzi Gotzone Larrarteri "arduragabekeria politikoa" eta "utzikeria" leporatzea.

Harenganako eta haren lanarekiko errespetu falta iruditzen zaigu, baina, era berean, uste dugu urte haietan Udaleko sailek eta prozesu osoan lan egin zuten pertsonek egindako lanarekiko errespetu falta dela.