Batzar Nagusien harreran, Eider Mendoza presidenteak azpimarratu du “Dragones de Lavapiés” eta “Vukovar 1991” taldeek gauza bat erakusten dutela, alegia, “futbolaren esperientzia kirola egitea baino askoz gehiago da, futbolak bakea, adiskidetzea eta bizikidetza egitzen laguntzen duelako, laguntasuna eragiten, errespetua ikasten eta elkar zaintzeko bitartekoa delako”, eta erantsi du “futbolean garrantzitsua dela irabazten jakitea galdu duena umiliatu gabe eta galtzen jakitea ere bai, besteak irabaztea onartuz”. Eider Mendozak adierazi du Batzar Nagusiak bat datozela balio horiekin.

Lavapiesko futbol taldean 32 naziotako mutikoek jokatzen dute, adibidez, Txina, Ekuador, Senegal eta Errumaniakoek, 5 urtetik 14 artekoak dira, gehienak egoera zailean bizi direnak. Vukovarko taldea, berriz, Zagreben sortu zuten serbiarren sarraskietatik ihesi joandako pertsonek, 1991n. Oraindik zatiketa handia dago Vukovarren, esate baterako, kroaziar eta serbiar umeek ezin izaten dute eskola berera joan, aisirako ere leku desberdinak dituzte… Giro horretan, “Vukovar 1991” futbol taldean elkarrekin daude kroaziarrak eta serbiarrak.