Nuria Carbonell, Kultura, Jaiak eta Gazteria zinegotziak nabarmendu du nazioartekotasuna eta tokikotasuna uztartzen jarraitu nahi izan dutela: “gure produkzio lokalari merezi duen tokia emanaz, eta estilo honetako talde eta bakarlari esanguratsuenei muzin egin gabe”. Nafarroa, Gipuzkoa edo Bizkaiako taldeetatik hasi, eta Estatukoak zein Estatu Batuetako musikariak ere izango ditugu gure artean.

Tolosan jaialdia bera herriko txoko ezberdinetan banatzen saiatu direla gaineratu du zinegotziak, eta zentzu horretan oso interesgarria dela espazio txiki eta handien artean lortu den oreka: “Euskal Herria plaza edo plaza Berritik hasi eta Ilargi, Saikin2 edo Solana4 bezalako gune txikiagoetararte”.

Guztien artean antzeman daiteke genero berdinaren barruan estilo ezberdinetako bakarlari edo taldeak direla, bluesaren barruan ere gustu guztiei tokia egiteko helburuarekin egin dutela adierazi du Carbonellek: “eta noski, aukeraketan lan handia egin dute Udaleko teknikariek eta Iñigo bezalako blues jarraitzaile sutsuek, eta kalitatea gorena izango da. Hori bermatua dago”.

Eta zentzu horretan bere eskerrak eman dizkie proiektuan sartu diren eragile, laguntzaile, eta aipatutako tabernaei “blues jaialdiaren alde egiten duten esfortzuagatik”.