Gobernuari kontrola egiteko datorren asteartean egingo den osoko bilkuran, Maria Eugenia Iparragirrek Estatuko Exekutiboak eta Kultura Ministerioak proiektu hau gauzatzeko hain beharrezkoa den erakundeen arteko elkarlanerako duten benetako borondatea zein den galdetuko die Gobernuko ordezkariei.

“Tamaina honetako egitasmoaren kudeaketarako formulak beharrezkoa du, dudarik gabe, parte hartzen duten erakunde guzti-guztien elkarlana”, iritzi dio senatari irundarrak. “Ezin diogu aukera honi pasatzen utzi; Donostia, Gipuzkoa eta Euskadirentzako hain garrantzitsua den aukera”.

Donostiako EAJren alkategai den Eneko Goiak duela gutxi aipatu duenez, “aukera hau berebizikoa da Donostia kulturaren nazioarteko erreferentea bihurtzeko helburuari ekiteko”, eta, ildo horri jarraituz, Iparragirre senatariak “Estatuko zein nazioarteko turismoa garatzeko” aukera ere badela gaineratu du, “bai maila orokorrean, bai maila partikularrean, kultur arloan”. Honekin batera, 2016an Donostia Europako Kultur Hiriburua izateak “kanpokoen ikuspegitik hiriaren eta Euskadiren irudia hobetzeko balioko du”, eta, gainera, “hiriaren berpizkundea eta industria eta enpleguaren garapena erraztuko du, batez ere sormenezko industriarena”, Iparragirrek azaldu duenez.