Arrasateko EAJ-PNVk irmoki gaitzetsi ditu joan den igandean, uztailaren 19an, Munduko Txapelketako finalaren emanaldia zela eta, herriko hainbat ostalaritza-establezimendutan gertatutako mehatxu eta larderia egoerak. Bai partida ikusten ari ziren herritarrek, bai tabernetako langileek mehatxuak eta jarrera oldarkorrak pairatu zituzten.

"Horrelako jokabideak guztiz bateraezinak dira errespetuarekin eta bizikidetzarekin. Gure babes eta elkartasun osoa adierazi nahi diegu mehatxu horiek jasan zituzten herritar guztiei", adierazi du Arrasateko EAJ-PNVk. "Inork ez luke beldurrik edo larderiarik sentitu behar kirol ekitaldi batez gozatu edo normaltasunez bizitzeagatik. Herritar guztiek dute espazio publikoak askatasunez eta beldurrik gabe partekatzeko eskubidea".

Era berean, talde jeltzaleak berriro berretsi du euskal selekzioaren nazioarteko aitortzarekiko duen konpromisoa. "EAJ-PNVk beti defendatuko du euskal selekzioak nazioarteko lehiaketa ofizialetan parte hartzeko duen eskubidea. Hori da gure selekzioa. Baina aldarrikapen hori beti egin behar da errespetutik, bizikidetzatik eta tolerantziatik. Mehatxuak, erasoak eta edozein jarrera intolerante onartezinak dira, eta gaitzespen irmoa merezi dute", amaitu dute.