Eusko Jaurlaritzak Hondarribiko Udalari Hondartza futbol zelaian belar naturala belar artifizialagatik ordezkatzeko obrak egiteko baimena eman dio. "Duela aste batzuk esan genuen baimen hori posible izango zela. Gaur errealitate bat da: baimena sinatuta dago", adierazi dute EAJ-PNVtik.

Jeltzaleek gogorarazi dute urrats hau azken hilabeteotan egindako lan instituzionalari esker izan dela posible. Alde batetik, EAJ-PNVk Madrilen bultzatutako akordioari esker lurzoruen desafekzio prozesua desblokeatu ahal izan da. Bestetik, kostaldearen antolamendu eta kudeaketaren eskumena Eusko Jaurlaritzaren esku geratu izanak ahalbidetu du, duela hilabete gutxira arte Estatuko Gobernuaren esku zegoen baimena gaur egun Eusko Jaurlaritzak ematea.

EAJ-PNVk eskerrak eman nahi izan dizkio Eusko Jaurlaritzari prozesu osoan erakutsitako lankidetza eta prestutasunagatik.

Orain Udalaren txanda da

Behin baimena emanda, EAJ-PNVren ustez, Udalari dagokio orain obrak martxan jartzeko beharrezko izapideak osatzea.

Horretarako, gogorarazi dute duela hilabete batzuk 2019an idatzitako proiektua eguneratzeko proposamena egin zutela. "Orain proiektu hori eguneratu, obra lizitatu eta, azkenik, jarduketa gauzatzea dagokio Udalari. Azkenean, proiektu hau errealitate bihurtzeko baldintza guztiak betetzen dira. Ibilbide-orri argia dago, eta Udalarekin elkarlanean jarraitu nahi dugu Hondartzak, ahalik eta lasterren, klubak hainbeste urtez eskatu duen futbol zelaia izan dezan", amaitu dute.