EAJ-PNVk azpimarratu du Hondarribia une erabakigarrian dagoela Hondartza futbol zelaiaren eremuan aurrera egiteko, bai lurzoruen titulartasunari dagokionez, bai kirol azpiegituren hobekuntzan.

Alde batetik, lurzoruen desafekzio prozesuak aurrera egiten jarraitzen du EAJ-PNVk Madrilen bultzatutako akordioari esker. Hurrengo asteetan, espedienteak urrats erabakigarria emango du bere tramitazioan, Ogasun Ministerioaren esku geratuz, hark kudeatuko baitu lurzorua Hondarribiko Udalari lagatzeko prozesua.

Bestalde, lortutako akordioen ondorioz, kostaldearen antolamendu eta kudeaketaren eskumena Eusko Jaurlaritzaren esku geratu da. Horrek esan nahi du Hondartza futbol zelaiko obra egiteko baimena orain Portuak, Itsas Gaiak eta Litoralaren Zuzendaritzaren esku dagoela.

Zentzu honetan, EAJ-PNVk azpimarratu du Eusko Jaurlaritzak jarduera hau baimentzeko duen borondatea. Hondarribian egindako azken bisita batean, arlo honetako arduradun nagusiak, Amaia Barredo sailburuak, EAJ-PNVko zinegotzi Maria Serranorekin izandako bileran, udalarekin elkarlanean aritzeko prestutasun osoa adierazi zuen.

Udalaren txanda

EAJ-PNVk adierazi du bere gain hartutako konpromisoak bete dituela, eta urteetan aurrera egitea eragotzi duen egoera bat desblokeatzea lortu duela.

EAJ-PNVk berriro ere adierazi du Udalarekin elkarlanean aritzeko prest dagoela, proiektu hau ahalik eta azkarren gauzatu dadin, Hondarribia Futbol Elkartearen eskaerari erantzunez.

“Badago ibilbide-orri argi bat eta bidearen zati handi bat eginda dago. Orain Udalaren txanda da”, adierazi dute.

EAJ-PNVren arabera, azkartasunez jokatuz gero, belar artifiziala jartzea errealitate izan daiteke 2026an.

Horretarako, ezinbestekotzat jotzen dute Udalak duela aste batzuk proposatutako kreditu-aldaketa onartzea, 2019an egindako proiektua eguneratzeko, eta behin eguneratuta, obra egiteko baimena ofizialki Eusko Jaurlaritzari eskatzea.

Galdu ezin den aukera

EAJ-PNVk gogorarazi du Hondartza futbol zelaian belar artifiziala jartzea Hondarribia Futbol Elkartearen aspaldiko eskaera dela, eta 2019an ezin izan zela gauzatu Estatuaren baimenik ez zegoelako.

Gaur egun, ordea, testuingurua aldatu egin da. Eusko Jaurlaritza da orain jarduera baimentzeko eskumena duen administrazioa, eta horretarako prestutasuna agertu du.

“Gaur egun badago lehen ez genuen aukera erreal bat. Orain da jarduteko momentua. Ezin da aukera hau galdu”, amaitu dute.