Segundo Garin zerrendaburuaren hitzetan, “Oiartzungo  herritarren zerbitzurako proposamenarekin aurkezten naiz, EAJ-PNVren alkategaia. Euskal Herriko Unibertsitateko irakaslea, irakaskuntza eta euskara  landu  izan ditut nire ibilbidean, batez ere. Herriaren alde lan egiteko, Oiartzun hobea xede duen talde sendo eta eskarmentu duena osatu dugu, eta horren buru izendatu naute”.

Eusko Alderdi Jeltzalearen zerrendaz hitz egiterakoan, taldearen garrantzia azpimarratu nahi izan du Segundo Garin alkategaiak, “talde dinamiko, eraginkor eta sendo bat osatu dugu. Oiartzunek behar eta merezi duen aldaketa eragin nahi dugu, pertsonak azkeneko xedea izanik. Udala herritarrei zabaltzea bultzatu nahi dugu, kudeaketa on bat eskainiz, gardentasunean eta hurbiltasunean oinarritzen den kudeaketa. Beti gure herritarren zerbitzura”.    

Adin eta ibilbide desberdineko jendea, eskarmentua eta berritasuna elkartzen dira EAJ/PNV-ren zerrendan. Anitza da zerrenda-kideen lanbideetan, jelkideak eta independenteak bat egin dute -alkategaia eta zerrendaren beste bederatzi lagun independenteak dira- eta Oiartzungo abertzaletasuna elkartu du bere baitan, hautagai batzuk EA eta Hamaika bat alderdietako burukide izandakoak dira. Segundo Garinek azaltzen duenez, “Eusko Alderdi Jeltzalearen bermea dakargu. Oiartzuarrak, euskaldunak, abertzaleak, demokratak, hona hemen gure taldearen ezaugarriak. Oiartzunen alde lan egiteak batzen gaitu. Herritar  guztion Oiartzun  bultzatu nahi dugu. Herri irekia, herritarren beharrei erantzun nahi diona, bakean, bizikidetzan eta kohesioan aurrera egin nahi duena. Horixe da gure herrikideei luzatzen diogun proposamena”.