San Inazio Egunaren bezperan urtero egin ohi bezala, Zumaian, hitzaldi politikoa eskaini du Markel Olano, EBBko kideak. Euskal gatazka politikoaren konponbidearen funtsa erabakitzeko eskubidearen onarpena dela azpimarratu du mintzaldian Markel Olanok. Zentzu horretan, hainbatek darabilten “akordio trasbersalak” esapidea aipatzen denean, Irlandako bake prozesuaren eredua jarraitzen dela azaldu du. Honen haritik, bake prozesu hartan, 1993an Britainiar Gobernuak Irlandako biztanleen autodeterminazio eskubidea onartu zuela ekarri du gogora Olanok, Downing Streeteko Adierazpena, alegia. EBBko kideak ohartarazi bezala, “Adierazpen hartan, erabakitzeko eskubidea onartu zen eta bere egikaritza hitzartu egin behar zela adostu zen”. Beraz, “biak dira ezinbestekoak; autodeterminazio eskubidea onartu eta akordio trasbersalak lortzeko lan gogorra egin”, argitu du. Zeregin horretan, Zapaterok ere bere egitekoa du, “erabakitzeko eskubidea onartu ezean, ez baitu euskal gatazka politikoa konponduko”, amaitu du Markel Olanok.