Joan den maiatzaren 12an, ostiralean, Arrasateko kanpoko igerilekuak ireki ziren, udako denboraldiari hasiera emanez. Hala ere, EAJ-PNVren udal taldetik, beste behin ere, herritarrek zerbitzu garrantzitsu bat itxita izatea deitoratu dute: udako txiringitoa.

Jeltzaleen arabera, egitate horrek agerian uzten du, berriz ere, egungo udal-gobernuaren plangintzarik eta kudeaketa-gaitasunik eza, beste zerbitzu batzuetan gertatu diren egoerak errepikatzen baititu, ur-parkeekin gertatu zen bezala.

Udako txosna, EAJ-PNV buru zuen gobernuak 2019-2023 legegintzaldian berraktibatua eta balioan jarria, herritarrek asko estimatzen zuten zerbitzu gisa finkatua zen, igerilekuen inguruneari erosotasuna, dinamizazioa eta kalitatea emanez.

Hala ere, uda honetan berriz ere ez dago martxan instalazioak irekitzeko unean, eta hori, talde jeltzalearen hitzetan, “inprobisazioaren eta aurreikuspen faltaren erakusgarri argia da”.

Ander Garay bozeramaileak azpimarratu duenez, “ez da gertaera isolatu bat, baizik eta udal kudeaketan behin eta berriz errepikatzen dinamika bat, non ez diren akatsak behar bezala aztertzen eta ez den egiturazko konponbiderik ezartzen halakoak errepika ez daitezen”. Adierazi duenez, egoera horrek “zuzenean eragiten dio zerbitzu publikoen kalitateari eta herritarrek udan herrian duten esperientziari”.

Alderdi jeltzaleak Mikel San Miguel kirol zinegotziari eskatu dio kirol-arloaren erantzukizuna bere gain har dezala eta txiringitoa ahalik eta lasterren irekitzea berma dezala, uztailaren amaierara arte luzatu gabe.

Era berean, EAJ-PNVk datorren urtera begira udako plangintza otsailean hasteko beharra planteatzen du, zerbitzu guztiak — txiringitoa eta ur parkeak barne — igerilekuak irekitzen diren lehen egunetik erabat martxan egon daitezen.

“Arrasatek herritarrek espero eta behar dutenaren mailako kudeaketa merezi du”, amaitu du Garayk.