EAJ-PNVk aurten bertan Hondarribiarentzat estrategikoak izango diren proiektu berrien idazketa eta prestaketa hastea proposatu du, udal taldeak 2026ko aurrekonturako kreditu-gehikuntzaren proposamenaren barruan.

Planteatutako jarduketen artean, EAJ-PNVk Harategi, Satarka kalea eta Gipuzkoa plaza ingurua berritzeko proiektuaren beharra nabarmendu du; udal taldearen ustez, alde zaharreko ingurune horrek esku-hartzea behar du hiri espazioa eta irisgarritasuna hobetzeko.

EAJ-PNVk gogorarazi du obra bat gauzatu ahal izateko ezinbestekoa dela aurretik proiektua idazten hastea. “Horrelako jarduketak datorren urtean egin nahi badira, lana orain hasi behar da”, adierazi dute.

Udal taldearen ustez, udal batek aurreikuspenarekin lan egin behar du, eta etengabe prest dauden proiektuak izan behar ditu, hiriak aurrera egiten jarrai dezan eta inbertsioak modu jarraituan gauzatu ahal izateko.

Zentzu horretan, EAJ-PNVk gogorarazi du aurreko agintaldia amaitzean hainbat proiektu eta jarduketa prest edo martxan utzi zirela, eta urte hauetan garatu direla; besteak beste, Santiago kaleko obra, Arrantzale Auzoko proiektua, Saindua Gaztelekuko obrak edo San Nikolas zubiaren berritzea.

Horregatik, udal taldeak proposatu du hiriko hainbat eremu eta arlotan proiektu berriak prestatzen hastea, mugikortasuna, espazio publikoa, kirol instalazioak, irisgarritasuna, ondarea eta ekipamenduak bezalako arloetan.

“Hondarribiak prest dauden proiektuak eta epe ertaineko plangintza behar ditu. Gure helburua hiria hobetzeko eta herritarren beharrei erantzuteko jarduketa zehatz eta beharrezkoak bultzatzen jarraitzea da”, amaitu dute EAJ-PNVtik.