Gaur egun, ia bi urte eta erdi gobernuan egon ondoren, zarata hura guztia isiltasun eta konponbiderik eza bihurtu da. Gure ustez, Hondartza kiroldegia ez da lehentasun bat izan egungo gobernuarentzat, gobernatzen ez zutenean egindako promesak, kritikak eta salaketen gogortasuna gorabehera.

Zerbitzu gutxiago, kuota berberak

Kiroldegiko kafetegia itxita dago 2024ko maiatzetik, eta sauna, berriz, aurtengo urtarriletik. Sutearen ondoren, ez zen premiazko bidetik berritu.

Gainera, instalazioen narriadura geldiarazteko beharrezko inbertsioak ez dira egiten ari, ikastaroen prezioak nabarmen igo dira eta kuota berak kobratzen jarraitzen da, herritarrek jasotzen dituzten zerbitzuak txikiagoak diren bitartean.

EAJ-PNVren gobernuak sauna eta spa guneak berritzeko proiektu bat prest utzi zuen. Zergatik ez da proiektu hori eguneratu eta aurrera ateratzen?

Plangintzarik ez eta informaziorik ez

Ia 30 hilabete hauetan ez da bilera bakar bat ere egin kiroldegiaren etorkizuneko kudeaketa nolakoa izango den aztertzeko. Ez dakigu zer plegu lantzen ari diren —lantzen ari badira—, zein puntutan dauden edo zein asmo duen gobernuak Hondartza kiroldegiarekin.

Jatetxe eta tabernaren inguruan ere informaziorik ez dago: ez dakigu zer gertatuko den berarekin, berriro irekiko den, zein baldintzatan edo noiz. Herritarrek ez dakite zein diren gobernuaren benetako asmoak, ezta egoera hau noiz arte luzatuko den ere.

Hondartza benetako lehentasun bihurtzea eskatzen dugu

EAJ-PNVtik Abotsanitzen gobernuari eskatzen diogu Hondartza kiroldegia benetako lehentasuna izan dadila behingoz, eta eskatzen dugu:

• Gobernuak kiroldegirako bere ibilbide-orria zehaztu eta publiko egin dezala.

• Informazio hori gainontzeko udal taldeekin parteka dezala, gardentasuna bermatuz.

• Zerbitzua lehenbailehen lizitatu ahal izateko plegu teknikoen idazketa bultza dezala. Badago EAJ-PNVk egindako aurretiazko lan bat, kiroldegiaren kudeaketarako plegu-proposamen batekin. Ez da hutsetik hasi behar.

• Eta etorkizuneko kudeaketarako lehiaketa lehenbailehen lizitaziora atera dezala, atzerapen gehiagorik gabe.

Kiroldegia funtsezko zerbitzu publikoa da Hondarribiarentzat. Ia 30 hilabete erabakirik hartu gabe gehiegi dira. Aitzakiek jada ez dute balio. Ekiteko eta erantzukizunak hartzeko garaia da.