EH Bilduren eta Elkarrekin Arrasateren Udal Gobernuak datorren urterako aurrekontua aurkeztu du, 38 milioi euroko mailegua barne, eta horrek kezka sakona sortu du EAJ-PNVn. “Udal Gobernuarekin bat gatoz proposatutako proiektuak beharrezkoak direla esatean, baina arduragabekeria iruditzen zaigu Udala hain zor handiarekin konprometitzea, aurrekontu osoaren -81 milioi- ia %47, datozen 20 urteetan gure finantza gaitasuna oztopatuko baitu” azpimarratu du EAJ-PNVko bozeramaile Ander Garayk, zinegotzi jeltzale guztiekin batera.

“Mailegu honek arrisku larrian jartzen du udalerriaren egonkortasun ekonomikoa, eta porrot egin lezake berehalako kautelazko neurririk hartzen ez bada. Gainera, kudeaketa txarraren seinaleak ikusten ari gara; izan ere, Alkatetzak agindua eman die sail guztiei euro bakar bat ere ez gastatzeko urtea amaitu arte, onartutako proiektuak blokeatuz eta arrasatearrek beren ordezkariengan jarri zuten konfiantza hautsiz”, gaineratu du.

Jeltzaleek galdegin dute: “Zer izango da Amaia Antzokia, Musakolako kiroldegia edo autobus geltokia bezalako funtsezko proiektuez? Badirudi Udal Gobernuak ez duela plan ekonomiko-finantzario argirik, eta horrek gure udalerrirako funtsezkoak diren proiektu askoren etorkizuna airean uzten du, zorra itzultzeko betebeharrak datozen 20 urteetako inbertsio ahalmena barregarria izatea eragiten baitu. Eta ez hori bakarrik, aurten mailegu osoa planteatzeko estrategia erokeria bat da, Iturriperen obra 30 hilabeterako planifikatuta dagoenean, eta horrek 3 urte hartzen ditu bere 3 aurrekontuekin”.

EAJk Udal Gobernuari gogorarazi dio badagoela gauzak egiteko beste modu bat. “Azken bi legegintzaldietan, EAJ-PNVk gobernatuta, frogatu dugu kudeaketa eraginkorrarekin eta zorpetzerik gabe posible dela 40 milioi eurotik gorako inbertsioak egitea eta zorra amortizatzea, udalerriaren egonkortasuna arriskuan jarri gabe. Kulturola, Juan Arzamendi Musika Etxea, Ekobulebarra, Araba etorbidea, Makatzena, Erguin eta Santa Teresako igogailuak eta beste proiektu asko modu arduratsu eta eraginkorrean egin dira, modu horretan hipotekatuko gaituzten maileguak eskatu beharrik gabe”.

Garayk posible ikusten du “aurrekontu orekatuagoa, eta proiektu guztiak aintzat hartuko dituen plan ekonomiko-finantzario bat idaztea eskatzen dugu, zorra ahalik eta gehien gutxituz. EAJ-PNV prest dago Udal Gobernuarekin lan egiteko irtenbide bideragarri bat aurkitzeko, baina ezin dugu onartu Arrasateren etorkizuna arriskuan jartzea erabaki arduragabe, ausart, zuhurtziagabe eta oso arriskutsu honekin. Planteatzen dutena da “gaurko ogia, biharko gosea”.

“EAJ-PNVk ekintzekin erakutsi du posible dela gutxiagorekin gehiago egitea. Ez dezagun onartu Udal Gobernuaren kudeaketa txarrak arriskuan jartzea Arrasateren eta arrasatear guztion etorkizuna”, ondorioztatu dute jeltzaleek.