Argazkiak...

DONOSTIA

2025/11/11

Argazkiak Ikusi

Jon Insausti eta Imanol Pradales bilera

Imanol Pradales lehendakariak harrera egin dio gaur Jon Insausti Donostiako alkateari Ajuria Enean, eta biek lehen bilera egin dute Donostiako Udalean garai berria ireki denetik; hain zuzen ere erakundeen arteko lankidetzari heltzeko asmoz.

Jon Insausti alkateak aliantzaren garrantzia azpimarratu du, eta esker ona adierazi dio lehendakariari Eusko Jaurlaritzak Donostian egindako bi inbertsio estrategiko indartsuengatik, hots, ordenagailu kuantikoaren instalazioa eta protonterapia zentroaren eraikuntza. Biak ala biak konpromiso irmoaren adierazgarri direla nabarmendu du.

Era berean, alkateak etxebizitzaren arazoari konponbideak bilatzea lehentasuneko gaia dela adierazi dio lehendakariari. Halaber, erabateko prestutasuna berretsi du ahalik eta lursail gehien etxeak eraikitzeko bideratzeko, hala donostiarren beharrak asetzeko. Esaterako, Udalak Auditz Akularreko eremuaren garapen urbanistikoaren alde egindako apustu berezia azpimarratu du, 3.000 etxebizitza hartzeko gaitasuna duena.

Bestalde, Insaustik Anoeta Berriko kirol-instalazioen berrikuntza integralari buruzko akordioan aurrera egiteko eskatu dio lehendakariari eta biek kirol hiriarekiko konpromisoa berretsi dute. Mugikortasuna izan da bileran landutako beste lerroa, Loiolako Erriberako trukagailua edo Tabakalerako parke berria tarteko.

Segurtasunari dagokionez, alkateak adierazi du Ertzaintzaren laguntza izaten jarraitu nahi duela, 2027an Egiako polizia-etxea errealitate izan dadin. Miramongo Parke Teknologikoaren hazkundea ere jorratutako gaia izan da, ikerkuntza arloan erreferentea izatea xede duen eremua baita bi erakundeen arabera. 

Bilerak, azkenik, bi erakundeetako lantaldeak osatu eta 2025-2027 eperako elkarlan markoa ezartzeko balio izan du. Hortaz, alkateak eta lehendakariak gobernantza partekatuaren konpromisoak, mugarriak, kronograma eta gakoak finkatu dituzte.

https://youtube.com/shorts/EqaV8OFvBk4?feature=share