Gaur egun, Irunek aparkaleku publiko bakarra du. Tamalez, hau Euskotrenen erabiltzaileei soilik bideratuta dago. Beraz, pertsonak lehenago edo geroago txartel pertsonalizatu batekin baliozkotutako bidaia bat egin badu bakarrik erabil dezake, eta denbora mugatu batez, gainera.

Horregatik, EAJ-PNVtik beste urrats bat eman nahi dugu bizikletaren kulturaren garapena eta mugikortasun iraunkorragoa sustatzeko. Hala ba, gure hirian bizikletentzako aparkaleku publiko eta seguruen sare bat sustatzea proposatzen dugu, behar duten pertsona guztiek erabili ahal izan dezaten.

Bizikleta Irungo garraiobide gisa erabiltzea sustatu nahi badugu, gure ustez ez da nahikoa loturarik gabeko bidegorri-sare batekin eta Euskotrenen erabileraren baldintzapeko aparkaleku batekin. Gaur egungo eta etorkizuneko erabiltzaileei bizikletak aparkatzeko eta gordetzeko espazioak eman behar zaizkie: ez dutelako non aparkatu etxean lekurik ez dagoelako, igogailurik ez dagoelako, Irunera bizikletaz etorri direlako eta ez dutelako non utzi modu seguru eta estalian, etab.

Bizikleten aparkalekuak kudeatzeari eta arautzeari dagokionez, hainbat formula egon litezke, adibidez, abonuen edo tarifen bitartez. Ondorioz, ekimen hau egia izan dadin, hurrengo Kreditu Aldaketari zuzenketa bat aurkeztuko diogu, gure hiriko hainbat tokitan bizikletentzako aparkaleku seguruak eta estaliak kokatzeko dauden aukerak aztertuko dituen azterlan eta proiektu bat egitea helburu duena.

EAJ-PNVtik uste dugu beharrezkoa dela kokapen posibleak aztertzea eta, gainera, herritarrei oro har eta gure hirian interesa duten elkarteei ere galdetzea, guztion arteko benetako lankidetza sustatuz.