Gaurkoan, Irungo Udaleko Euskara Ordezkaria den Josune Gomez Lekaenea eskolara gerturatu da SOLAS JOLASeko parte-hartzaileekin hitz egitera eta lehen inpresioak jasotzera eta bertan zera aipatu du, "Programa honen bitartez Irungo umeek aukera izan dute, ikasgelatik kanpo eta modu naturalean euskaraz disfrutatzeko eta bizitzeko".

Izan ere, izen emandako haurrei begira antolatutako programazioak ezusteko atsegin kontaezinak ekarri baititu berarekin, den-denak euskara ikasteko eta erabiltzeko motibazio tresna izan den ipuinetan oinarritutako programazioa; Era guztietako tailerrak, sukaldaritza tailerrak, Irrisarrilandera irteera, Cristina Eneara, Eureka Zientzia Museora, mendira, Topic Tolosara, Ekogunera, txalupan paseoa, Santa Klara irlara, Listorretara, etab. Gainera, hilean behin, "egun osoko" irteera izango da, 14:30ak arte Haur Hezkuntzakoen kasuan eta 17:00ak arte Lehen Hezkuntzakoenean. Dena behar bezala joateko ardura izan dute hezitzaileek, zentroetako 13 koordinatzailek eta 3 koordinatzaile orokorrek. Aurten gainera 69 hezitzaile horietatik 13 dibertsitate funtzionala duten umeekin lanean dabiltza.

Irungo Udaleko Euskara Ordezkaria den Josune Gomezek azpimarratu nahi izan du, gainera, funtzio aniztasuna duten pertsonekin programa honetan aurrera eramaten den lana, "funtzio aniztasuna duten haurrek parte hartu dute eta beraiekin eta laguntza hezitzailearekin -bat funtzio aniztasuna duen haur bakoitzeko- harremanetan normalizatutako sistema baten bitartez lan egiten gabiltza; hau da, parte hartzaile guztiek, izan funtzio aniztasuna ala ez, eskubide eta betebehar berdinak edukiz, beti ere funtzio aniztasun horiei egokituta, jakina".  

Batzuen gozatzeko azken ordua den bitartean beste batzuentzat gozamena hastera doa, izan ere, SOLAS JOLAS programako abuztuko txanda ate joka dator. Abuztuaren 2tik 25era 112 haurrek txandari kaixo esango diote.