Hilabete bukaeran aurkeztuko da eta hauek izango dira ardatz nagusiak:  zaborren kudeaketa, krisia eta enplegua, gizarte politika, gobernu ona, azpiegituren gestioa eta kultura. "Gipuzkoari bultzada emateko proposamen zehatzak aurkeztuko ditugu eta azken urteotan korapilatu diren arazoei konponbidea emango diegu", esan du Olanok.

Azaldu du kudeaketa planik ahalik eta egokiena egiteko, gizarte eragileekin eztabaidatutako prozesua egingo dela, eta horretarako diputatuekin,  foru aldundiko langileekin eta Gipuzkoako eragileekin eztabaidatutako plana bultzatuko dutela.  Hiritarren iritzia ezagutzeko ere inkesta bat egingo du Aldundiak.  "Gestio plana oso elementu garrantzitsua da guretzat, eta azken emaitza aberasteko ekarpen guztiak jaso nahi ditugu", adierazi du.

Olanok esan du ekonomikoaren suspertzeak garrantzia berezia izango duela kudeaketa plan honetan eta horren erdian kokatu du krisiari  aurre egiteko plana. Ildo horretan, esan du  Gipuzkoako foru gobernua krisiari aurre egiteko programa batean buru-belarri ari dela lanean eta datorren urteko aurrekontutik 50  milioi euro bideratuko dituela proiektu honetara. Izan ere, Gipuzkoako ekonomia sustatzeko ekimena izango da eta Gipuzkoako gizarte eragileek ere parte hartuko dute proiektuaren diseinuan. Diputatu Nagusiak berak hartu du prozesua gidatzeko konpromisoa.  "Ekonomia sustatzea eta lurraldeko eragileei laguntzea dira legealdi honetarako  finkatu ditugun lehentasunak. Horrelako neurriekin krisitik atera eta Gipuzkoa lehentasunezko tokian kokatu  nahi dugu", nabarmendu du.

Azken datu ekonomikoak kontuan hartuta, Olanok esan du "Gipuzkoa hazkunde ekonomiko batean dagoela eta Euskadiren datu ekonomiko onekin batera, baikor izatera eramaten gaituela honek". Zehazki , uztaileko diru bilketaz  mintzatu da Olano, iazkoarekin alderatuta,  %5.2 hazi delako diru bilketa. Diputatu nagusiak argitu duenez, diru bilketa osoa 2.669  milioi eurokoa izan da (iaz baino %3.8 gehiago); itzulketak 805 milioi eurokoak  ( %0.7 gehiago) izan dira, beraz  bilketa garbia 1.864 milioi eurokoa izan da,   2014. urtean baino 93 milioi euro gehiago,  %5.2 gehiago alegia.  Olanok argitu du lanaren etekinaren eta irabazien gaineko zergen igoeraren ondorioz gehitu dela  diru bilketa; BEZa eta PFEZ-A jeitsi egin direla esan du.

Datu ekonomikoekin baikor,  Olanok esan du PFEZ-aren  eta sozietateen gaineko zergaren kanpainak  bide onetik doazela, eta laster ezagutuko ditugun abuztuko  datuek baieztatuko duela joera on hori. "Gipuzkoa sendotzea da gure helburua eta bide onean goaz", jakinarazi du Olanok.

Datu ekonomikoen errepasoaren ondoren, diputatu nagusiak  esan du foru gobernua lanean erabat murgilduta dagoela; agintaldiko lehen bi hilabete hauek etxea lanean jartzeko eta izendapenak egiteko baliatu dituztela eta aurrerantzean eguneroko lanean murgilduta arituko dela aldundia. "Gipuzkoarrek euren konfiantza eman digute eta ez diegu hutsik egingo. Gipuzkoarron arazoak konpontzera gatoz eta proiektu asko ditugu. Ziur gaude, lau urte barru, Gipuzkoa egoera askoz hobean egongo dela", aurreratu du.

Amaitzeko, Olanok esan du uda "ezin hobea" izan dela, eta batez ere turismo datuei begiratura,  azken urteotako udarik onena izan dela Gipuzkoan. Abuztuko datuen faltan, Olanok esan du uztailean 112.500 turismo sarrera izan zirela Gipuzkoako dendetan eta  245.200 lagunek pasa zutela gaua Gipuzkoan, iaz  baino %10.9 gehiago. Eta datu on hauek kostaldean ez ezik, barnealdean ere eman dira: kostaldean okupazioa %79koa izan da, barnealdeko nekazal etxeetan iaz baino %14 gehiagokoa. "Datu oso onak dira, eta kontuan izan behar da oraindik abuztua eta iraila falta direla; eta   hor, agendan  daude, besteak beste,  Tabakaleraren irekiera, estropadak, Euskal- jaiak edo Zinemaldia, turista asko erakartzen dituzten  hainbat ekitaldi garrantzitsu".