Abenduaren 23an Sasietako zuzendaritza batzordeak bilera egin zuen, eta bertan onartu zuten GHKrekin zabortegiaren iragazgaiztea gauzatzeko hitzarmena, eta bestalde, Mankomunitatearen 2015eko aurrekontua.

Sasietako Mankomunitateko Batzarrean EAJ-PNVren ordezkari diren Urretxuko Itziar Agirrek eta Beasaingo Aitor Aldasorok, Legazpiko Fco. Javier Iraeta, Zumarragako Iñigo Peñagarikano, Ordiziako Jose Miguel Santamaría eta Lazkaoko Felix Urkola zinegotzi jeltzaleekin batera, prentsaurrekoa egin dute. “EAJ-PNVk ahaleginak egingo ditu Bilduk Sasietako zabortegia berriro ireki ez dezan” adierazi dute, eta era berean, ezker abertzalearen nahia Sasietako zabortegia Gipuzkoako bakarra izatea dela salatu dute, "iraganeko eredura itzularaziz". Agirre eta Aldasororen ustez, Bildu Sasieta irekita mantentzen tematu da, kosta ala kosta. Kontrako iritzien aurrean, Bilduk bere tesiak inposatu ditu eta kudeaketa-iluna gauzatu du Mankomunitatean eta, ondorioz, mankomunitatearen lege-, ingurugiro- eta finantza-egoera oso larria da.

Horren harira, Sasietako Batzarraren ordezkari jeltzaleek zalantzan ipini dute Mankomunitateak eta GHK hondakin partzuergoak sinatutako hitzarmenaren legezkotasuna: “udalen ordezkariei hitzarmena ez zaie bidali eta, baldin eta deialdiarekin batera dokumentazioa bidaltzen ez bada, akordioa indargabea baita”. Hortaz, Itziar Agirrek eta Aitor Aldasorok honakoa esan dute: “Lege-txostena eskatu dugu, izan ere, hitzarmenak 2015eko aurrekontuan eragina baitu, aurrekontu-sail propioa txertatu beharko litzatekeelako”. Gainera, ordezkari jeltzaleak azaldu dute, erabakia atzeratzeko eskatu ziotela Bilduri, hitzarmenaren edukiak aztertzeko. Bilduk ordea, ez zuen eskaria onartu;  "bere helburua hitzarmena ahalik eta lasterren onartzea eta inposatzea zen, baldin eta hitzarmena pixka bat aztertuko bagenu, ez bailitzateke onartuko".

Era berean, iragazgaiztea gauzatzeko prozedurari buruz, Agirrek eta Aldasorok honakoa salatu dute: “Bilduk ez ditu aintzat hartu Sasietako teknikariak eta Geiser ingeniaritzak diotena, izan ere, teknikariek ez dute iragazgaiztea gauzatzeko behar adinako bermerik ikusten. Are gehiago: Bilduk 2011tik ezagutzen ditu hondakinak jasotzen jarraitu ahal izateko Sasietaren baldintzak. Baina aitzitik, ez du ezer egin eta, ondorioz, orain GHK hondakin partzuergoarekin hitzarmena asmatu behar izan du zabortegia irekita mantentzeko. Hau da, Bilduk zabortegia iragazgaizteko lanak egingo ditu, hain zuzen ere, zalantza handiak sortzen dituzten gauzatze-lanak, gainjarrita pilatzen den hondakin kopuru handi baten gainean egingo baitituzte”.

Sasietako Batzarrean EAJ-PNVren ordezkariek honakoa salatu dute: “Sasieta da kaltetuena GHK-rekin egindako hitzarmenean. Izan ere, GHKak finkaturiko obra ordaintzera behartua legoke eta gainerakoen hondakinak hartuko lituzke, baina ordainetan ez du ezer jasoko. Goierriko Bildu GHKren agindupean aritu da eta bere jardunean goierritarrak kaltetu ditu, beste behin ere, ezker abertzalearen muturreko jarrerak inposatu dira. Horrenbestez, Itziar Agirrek eta Aitor Aldasorok salatu dute, Urtetan gertatu den bezala, Sasietan Bilduren nahia dela goierritarrei ordainaraztea bere kudeaketa kaxkarraren ondorioak. Jeltzaleen ustez, horrek erakusten du ezker abertzalea ez dela gai izan herritarren arazoak konpontzeko eta aldez aurretik pentsatu gabeko erabaki inprobisatuak hartu dituela.

Sasietako Mankomunitatearen 2015eko aurrekontuari buruz, jeltzaleek honakoa esan dute: “Udalen ordezkariei bidalitako aurrekontuak aldaketak ditu hasierako aurrekontuarekiko, eta ez du aurreikusten GHKri nola ordainduko zaizkion iragazgaizte lanak, ez teknikarien iritzia iragazgaiztea ez egiteko aukerari buruz. Eta, are gehiago: baldin eta iragazgaiztea gauzatzeko aukera egongo balitz, Bilduk ez du aurreikusi Sasietara hondakinak eramateak duen arriskua – izan ere, Sasietak orain baino hiru aldiz hondakin gehiago jasoko luke –, ez hondakin gehiago jasotzeak duen kostu ekonomikoa”.

Azkenik, Itziar Agirrek eta Aitor Aldasorok segidakoa salatu dute: “Bilduk onartutakoa hutsa edo indargabea da, iruzurra eta inposizioa da; hau da, hauteskundeen ondoren lehertuko den auzia. Eta, gainera, Urtetan gertatu bezala, Sasietan ere oraindik ez da aurkeztu hondakinak lekuz aldatzeko instalazio proiektuaren bozetorik ere”. Hortaz, Sasietako Batzarrean jeltzaleen ordezkariek Bilduri honakoa eskatu diote: “Indarrean dagoen Foru Araua betetzeko, betiere, zabortegia behin-betiko ixteko eta ingurunea berreskuratu ahal izateko. Ezker abertzaleari ez diogu onartuko bere erabakiekin goierritarrak kaltetzea”.