"Pasaiako Udalak berriz eskatu berri du, beste behin, Donostiako udal barrutiaren parte bat, oraingoan Gipuzkoako Foru Aldundiari egin dio eskaera. Pasaiako eskaerak Donostiako barrutiaren %10i eragiten dio eta, garrantzitsuagoa dena, 25.000 donostiarri”, nabarmendu du Donostiako EAJ-PNVko bozeramailea den Eneko Goiak.

"Pasaiako Udala, gaur egungo errealitateari erabat bizkarra emanez, Donostiako barrutia modu esanguratsuan aldatzen saiatzen ari da; errealitate hori bi mendez sendotzen aritu da eta eskaera hori egiten ari da beretzat eskatzen duen lurraldean bizi diren 25.000 donostiarren nahiari erabat muzin eginez; hori da okerrena” nabarmendu du Goiak.

"Pasaiako Udalak Foru Aldundiarengana jotzeko hartu duen azken erabakia begi onez hartu du egungo Aldundiaren gobernuak, iniziatibaren bultzatzaileek aditzera eman dutenez. Ez gaitu harritzen. Igeldoren aurrekaria hortxe dugu, kasu horretan Aldundiaren Gobernuak, erabat alde bakarretik eta Donostiako Udala aintzakotzat hartu gabe, Donostiako lurraldearen parte bat bereizteko eta beste udalerri bat osatzeko erabakia hartu zuen”, gogorarazi du Eneko Goiak.

"Atentzioa ematen du, gainera, Donostiako Udal Gobernuak Pasaiako herriarekin gaur egun dituen mugak defenditzeko inolako iniziatibarik hartu ez izana. Egoera horren aurrean, eta udal gobernua beste behin ere ezer egiten ari ez denez, uste dugu Udalbatzak jarrera hartu behar duela hiritarrek ezagutu dezaten zein den milaka donostiarri eragin diezaieken gai honekiko jarrera”, amaitu du Eneko Goiak.