Alderdi konstituzionalisten ezezkoaren aurrean, ziurtatu du “erabakitzeko eskubidea aurrera eramateko abertzaleen batasuna behar beharrezkoa dela”. “Indarkeriaz betetako 35 urteren ondoren, erabakitzeko eskubidearen ariketa gauzatu ahal izateko ezinbestekoa da abertzaleok ados jarri eta alderdi konstituzionalistak geure posizioetara hurbiltzea”, adierazi du. Ezker abertzaleari ohartarazi dio “ez duela ezer ere lortuko” EAJ bide honetatik baztertzen saiatzen bada. “Bai beraiek eta bai guk, erabakitzeko eskubidea politika baldintzatzeko erabiltzen badugu ez dugu ezer ere lortuko eta ezingo dugu aurrera egin”, argudiatu du.

“Aurrerapausoak eman daitezke eta emango dira. Gauza bakoitza bere momentuan egin behar da, prisarik gabe”, esan du ezker abertzaleak azken asteotan erakutsi duen presa gogora ekarriaz. Ildo honetan, nabarmendu du euskal gizarteak 35 urte itxaron behar izan dituela ezker abertzaleak bide baketsu eta demokratikoen alde egiteko.