Administrazio Kontseiluaren idazkari Iñigo Barandiaranek esan du: “Ezker abertzalearen proposamenari ezetz esan diogu, legez kanpokoa delako, bete ezina delako eta errealitatetik oso urrun dagoelako”.

Horren harira, Barandiaranek ezker abertzaleari gogorarazi dio, proposamena epez kanpo egin zuela; hain zuzen ere, epea amaitu eta bederatzi egun beranduago. Hortaz, Kutxako Administrazio Kontseiluaren idazkariak segidakoa salatu du: “Ezker abertzaleak ez du gai honen gaineko aurreikuspen egokia egin”.

Era berean, Iñigo Barandiaranek ezker abertzalearen salaketei erantzun die – gogoan izan, ezker abertzaleak EAJ-PNVri behin eta berriro leporatu diola, politika- eta gizarte-eragileen iritzia ez duela kontuan hartu –: “Ezker abertzaleak jakin badaki maiatzean lan-taldea osatu genuela alderdi politikoen eta sindikatuen ordezkariok, baina aitzitik, ezker abertzaleak ez zuen lan-talde horretan parte hartu nahi izan. Eta, lan-talde horretan bertan, estatutu berriak onartu genituen, hain zuzen ere, legea betetzen duten estatutuak eta, betiere, eragile guztien artean adostuta. Gainera, estatutu horiek Kutxa banku-fundazio batean bihurtzeko bidezko konpromisoa hartzen dute”.

Azkenik, Barandiaranek honakoa esan du: “Martin Garitano diputatu nagusiaren proposamenak ezker abertzalearen helburu bakarra du: bere kontrolpean ez dagoena suntsitzea. Baina aitzitik, ezker abertzaleak ez du bere helburua lortu. Eta, aldiz, guk oso argi dugu Kutxarentzat nahi duguna: Kutxa modernoa nahi dugu, hain zuzen ere, Batzar Nagusien kontrolpean dagoena, Gipuzkoan errotuta dagoena, eta Bilduren eredu bolibariarratik urrun dagoena”.